Policia e Kosovës i ka shtuar aktivitetet në rrugë për të kontrolluar nëse masat e vendosura nga Ministria e Shëndetësisë për t’u mbrojtuar nga koronavirusi po respektohen edhe sot me rastin e festës së Fitër Bajramit.
E gjithë, sipas Policisë së Kosovës, po bëhet sipas një plani të gatishmërisë dhe reagimit kundër përhapjes së COVID-19.
Policia e Kosovës, ka konfirmuar, se kanë hartuar një plan operativ policor, e që ka për qëllim respektimin e vendimeve të institucioneve ndaj pandemisë.
“Policia e Kosovës, referuar vendimeve të institucioneve të Kosovës, si dhe referuar Planit të gatishmërisë dhe reagimit kundër Coronavirusit të ri COVID-19, ka hartuar me kohë urdhrin operativ policor të quajtur ‘UO për Gatishmëri dhe Reagim për Coronavirus-in COVID-19. Policia e Kosovës të gjitha aktivitetet dhe masat e deritanishme i ka ndërmarrë në koordinim të plotë me të gjitha institucionet kompetente në fushën e shëndetësisë dhe institucioneve tjera relevante, konform edhe angazhimeve dhe detyrave sipas planit për gatishmëri dhe reagim”, ka thënë zëdhënësi i PK-së, Daut Hoxha.
Sot shënohet dita e Fitër Bajramit.
Institutit Kombëtar i Shëndetësisë Publike, Bashkësia Islame e Kosovës dhe politikanët kanë bërë thirrje që gjatë kësaj dite të mos bëhen vizita familjare, për shkak të situatës me pandeminë.
Deri tani në Kosoë janë konfirmuar gjithsej 1 mijë e 32 raste pozitive me COVID-19, prej tyre 785 janë shëruar, ndërsa 29 kanë vdekur. Raste aktive mbesin edhe 218.
