Arrestohet eprori i Policisë në Ferizaj, dyshohet për fajde

Kronikë e zezë

Arrestohet eprori i Policisë në Ferizaj, dyshohet për fajde

Më: 16 shkurt 2021 Në ora: 19:37
Foto ilustrim

Inspektorati Policor i Kosovës respektivisht Departamenti i Hetimeve, ka arrestuar sot në orët e pasdites një zyrtar policor me gradën e kapitenit (punonjës në Drejtorinë Rajonale në Ferizaj) me dyshimin se i njëjti ka kryer veprën penale të fajdes.

Lajmin e ka konfirmuar, zëdhënësi i Inspektoratit Policor të Kosovës, Arbër Beka.

“Arrestimi i tij është bërë në flagrancë sot në orët e pasdites nga hetuesit e IPK-së në Ferizaj pas një hetimi të përbashkët me zyrtarët e Drejtorisë të Hetimeve të Krimeve Ekonomike dhe Korrupsionit të Policisë së Kosovës.Hetimi i përbashkët lidhur me këtë rast kishte filluar rreth një vit më parë kurse si të dyshuar janë të përfshirë edhe disa qytetarë”, tha ai.

Tutje Beka tha se “me urdhër të Prokurorisë Themelore në Ferizaj hetuesit e IPK-së janë duke realizuar një kontroll në shtëpinë e të dyshuarit në Ferizaj ku në cilësi të provave janë konfiskuar një sasi e konsiderueshme e parave të gatshme”.

“Hetuesit e IPK-së pritet të ndërmarrin edhe veprime të tjera hetimore lidhur me këtë rast në konsultim të vazhdueshëm me prokurorin përgjegjës në përputhje me autorizimet ligjore të IPK-së dhe Kodit të Procedurës Penale”, tha ai.

commentFirst article
Sot mund të lexoni Shfletoni kopertinat