Në pragun e etur për dritësirë
në Therandën e trashëgimisë së dëlirë
lis i palëkundur i kohëve
Ti Gjyshi im me zemrën zjarr
Sejdi Bajraktari i Parë.
Fjala jote me peshë guri
në çdo vend e në kuvend
ku ishe i parë dhe prijetar
më i përkushtuari pajtimtar
në afrim zemrash e emrash
se kishe njohuri të shumta
në rrjedha jete
për histori e burrëri.
Jehun epikë motesh
edhe në organizim luftrash
përherë të imponuara në shqiptari
kundër pushtuesve të shumtë
të parrënjë e barbarë
që të ketë frymëmarrje të lirë
në dheun e lashtë të shqipeve
me ninulla zemre përtërirë.
Në ballë të Bajrakut besueshmërinë shenjtëri
që në rininë e hershme dhe deri në përjetësi,
dhjetëvjetëshit të parë të shekullit XX
trimërinë në flakërimë shqiponje
jehut shteg më shteg
përballjen me Turq të Rinj
në Grykë të Carralevës më 1909-1910,
me të përdaltën krajli
në Bajë të Malishevës mars-prill 1914,
në Jaglinicë të Prizrenit më 1918.
Në bashkim trimash
me përkushtimin madhështi
edhe në mbrojtje të fshatit Gjinoc
më 12 prill 1941.
Kulla jote me frengji
arkitekturë e dalluar e kohës
në rrënjët e trashëgimisë së dëlirë
që e skalite vetë Ti Gjyshi im shkëmb graniti
me vizionin e ri
Kullë e rrënuar shumë herë nëpër mote
nga furtunat e pandalura blu
të pushtuesve të parrënjë
me sy dhelpërash.
Gjysh i jehut krenar
Sejdi Bajraktari i Parë
jetën përherë të flakëruar
me guximin e kalitur trofe
për gjuhën e lashtë shqipe
dhe për komb e atdhe
edhe nëpër burgjet e pushtuesve
shumë herë i ngujuar.
Në oda burrash
që gjasonin në kuvende
dhe kudo që gjendeshe
te gjithë të dëgjonin
se krijoje rend
nuk rëndoje askend që nuk e meritonin.
Puthadorët që të përgjonin
historinë e shëmtonin.
Nga fotografia e varur në mur
etnografi krenarie në shtatin tënd
lashtësi sublime e pëcjellë ndër breza
tirq të të bardhë në gjasim bore
qëndisur me gajtana të zi
rrethatoren ngjeshur brezit
me kobure e jatagana
gjerdan fishekësh krejt hirësi
mbi gjamadan e kllapadana.
Gjyshi im zulmëmadh
Sejdi Bajraktari i Parë
në hulumtim gjurmësh për Ty
më thanë se ishe i vetëmi trashëgimtar,
nuk kishe as motër dhe as vëlla
se babai luftëtar-prijetar
në fushë të nderit të ishte vrarë
në moshë shumë të re
trimave luftëtarë duke iu prirë në ballë
në mbrojtje të tokës mëmë
nga turku në përpëlitje
dhe i përdalti Mali i Zi,
atje edhe gjendet varri i ti
digë e fortë për jetë e mot.
Nënë Shahsenja të mbeti herët e ve
krejt nuse e re
Penelopë në krah baladash,
përkushtimin shenjtëri
për rritën tënde
që të bëhesh pishtar e luftëtar
babait trim për t’i përngjarë.
Gjyshi im i jehut krahështrirë
për madhështinë tënde
krenaria mal me borë,
zemër e kurorë.