Sherri
Miu buburrecit
I tha në hajgare,
Pse kaq të vogël
E ke kokën, ore… ?!
Për mend’ o zotëri
S’kam fare shkollë,
Por, ama, belin,
Pse e ke të hollë?!
Belin për hijeshi
E kam torrollak,
Po, por, nga poshtë
Ma ke gjithë atë bark!
Kujdes byrazer
Ma plase vrerin,
Poshtë mos më nguc
Se ma sheh sherrin!
FAQJA ME PAMBUK
Berberi duke rruar
Myshteriun Faruk,
Fët e pret në faqe
Fët një copë pambuk!
Prerjet përsëriten
Disa herë tërkuzë,
I mërzitur myshteriu
Foli nëpër buzë...
Mirë këtë anë e mbolle
Me pambuk thellë:
Po faqen tjetër
Me çka po e mbjell ?!
ÇELËSI
Nga të pirët e tepërt
Një pianik fare,
Provon derën e shtëpisë
Ta çelte me cigare!
Mbasi nuk ia doli
Kërkoi ndihmë i gjori,
Nga një kalimtar
Që shkonte atypari.
Po ky nuk është çelës,
Brenda për të hyrë:
- O të keqen çelësin
Unë e paskam pirë!