Ministria e Kulturës, Rinisë dhe Sportit ka ndarë sot Çmimin Kombëtar për Vepër Jetësore “Bekim Fehmiu” në fushën e kinematografisë poetit dhe kritikut letrar Azem Shkreli - post mortum, ndërsa çmimi vjetor iu nda regjisores Burbuqe Berisha dhe aktorit Kushtrim Hoxha.
Nikoqiri i kësaj ngjarje, ministri i Kulturës, Rinisë dhe Sportit, Kujtim Gashi, tha se të gjitha ato rezultate që kanë ndodhur në fushën e kulturës po kurorëzohen me shpërblime.
Gashi: Po shpërblehen të arriturat e filmit
“Natyrisht që është një ditë shumë e rëndësishme edhe për ju edhe për ministrinë dhe Qeverinë e Kosovës, por edhe për të gjithë qytetarët, sepse të gjitha ato rezultate që kanë ndodhur në fushën e kulturës, përkatësisht në kinematografinë e filmit dhe industrinë kosovare të filmit sot po shpërblehen”, tha Gashi.
Krahas sukseseve të filmit në arenën ndërkombëtare, Gashi tha se edhe buxheti është rritur.
Gashi: Kemi rritur buxhetin për filmin“Është fat i mirë që viti 2018 dhe viti aktual dhe viti 2017 kanë shënuar rezultatet të mëdha të filmit tonë edhe në arenën ndërkombëtare, dhe për këto rezultate për këto suksese ne e kemi rritur edhe buxhetin për qendrën kinematografike të Kosovës”, tha ai.
Me çmimin Kombëtar për Vepër Jetësore “Bekim Fehmiu” në fushën e Kinematografisë u nderua poeti dhe kritiku letrar Azem Shkreli - post mortum, çmim që e pranoi trashëgimtari i tij, Valon Shkreli.
Shkreli falënderoi Ministrinë e Arsimit, për siç tha, ruajtjen dhe kultivimin e vlerave artistike.
Shkreli: Ju falënderojmë për kultivimin dhe ruajtjen e vlerave artistike“Ne si familje jemi të nderuar që e morëm këtë çmim me këtë emër kaq të madh. Unë të falënderohem ty dhe gjithë stafit për angazhimin maksimal dhe për ruajtjen dhe kultivimin e vlerave artistike”, tha ai.
Fituesja e çmimit vjetor për kinematografi, regjisorja Burbuqe Berisha, e cila ndau çmimin bashkë me aktorin Kushtrim Hoxha, tha se çmimi “Bekim Fehmiu” është privilegji më i madh që mund ta ketë në karrierën e saj.
Berisha: Çmimi ‘Bekim Fehmiu’ është privilegj për mua“Çmimi ‘Bekim Fehmiu’ për mua është privilegj më i madh që mund ta kem. Faleminderit ministër që je gjithmonë afër neve dhe shpresoj që kjo veti shumë e mirë të vazhdojë në vazhdim, sidomos për filmin”, tha ajo.
E vajza dhe bashkëshortja e aktorit, Kushtrim Hoxha, pranuan çmimin dhe falënderuan për vlerësimin e aktorit.
Pjesë e jurisë profesionale që vlerësuan dhe vendosën për fituesit e çmimit janë More Raça, skenariste dhe regjisore Nëntor Fetiu, aktor, Fisnik Ademi, aktor, Marigona Bekteshi Ferati, dramaturg dhe regjisore teatri, si dhe Safet Beqiri, dramaturg.
Çmimi Kombëtar për Vepër Jetësore “ Bekim Fehmiu” u shoqërua me një statuetë dhe një certifikatë të nënshkruar nga ministri Gashi, dhe shpërblim në vlerë monetare prej 5,000 euro. Ndërsa, Çmimi Vjetor për Kinematografi kap vlerën 1.250 euro.
