Akti i parë
me të parë shkrepi ndjenja
joshja farfuritëse flakërimë
në atë çast m’u mor mendja
trup e zemër në drithërimë
ajo rrahu me rrëmbim
gjersa kapja atë fanitje
të pash Ty me shqetësim
je e vërtetë apo përhitje
unë të shihja me brerore
flokëlëshuar e sy pulitur
ëmbëlake dhe hyjnore
me vrull vashëror e të ndritur
tutje krenare Ti vazhdon
gjoja ngasjen pa e shquar
trupi shpirtin s’të shpëton
thash me vete i menduar
Ti e nxitur nga kërshëria
ktheve kokën për herë të dytë
u vështruam nga largësia
fytyrëskuqur ule sytë
fustan dallgëzuar nga puhia
nxitove disi e hutuar
prapa të ndiqte vetëm hija
mbylle derën shpirttrazuar
Nga përmbledhja me poezi të papublikuara me titull:
„Lindja e një dashurie dhe…“ (rreth 160 faqe). Në libër bëhet fjalë për lindjen e dashurisë, ecurinë, takimin e parë; fejesa, martesa, rëniet dhe ngritjet e pasionit, jeta, telashet dhe si përfundon, por dhe disa dashuri tjera. Kur të gjendet botuesi, do të informoheni.