Lurë ti moj me salltanate,
Me shumë hire dhe lezete,
Një gazetë e ke për vete,
T’i ujdis gëzime dhe derte.
Ta ndriçon ballin dhe nurin,
Ta driton gruan dhe burrin
T’i jep krahë krenarisë
T’i jep dritë urtësisë…
Një gazetë si meteorë
Që flet me zemër në dorë
Lurë moj me shumë adete
Një gazetë e ke për vete…
Në dorë ta jepë historinë,
Me zemër ta fal mirësinë
Të ujdis me rreze hëne
Të bekon me ritme zemre.
Kjo gazetë me emrin “Lura”
Ka bërë vend në odë me burra
Ka bërë vend në vend kararesh
Ka bërë hije në mes malesh…
Ajo thotë veç të vërtetën
Ngre në kult nderin dhe jetën
Të lartëson hiret, bukurinë
Është ilaç për vetë njerëzinë…
Ajo është për Lurën tonë
Çdo ngjarje i bën jehonë
Në të gjen pasqyrim
Çdo kujtesë e vendit tim…
Kjo gazetë që shkon në Lurë
Dhe kudo ku ka shqiptarë
Nuk do ndalet së dali kurrë
Lurë, lurianë i ka të parë.
Lurë, lurianë kudo që jeni
Këtë gazetë simbol ta keni
Që nga Shkodra gjer në Vlorë
Është tribunë e Lurës sonë.
Që nga Lezha në Sarandë,
Nga Përmeti në Tiranë
Vjen e shkon gazeta “Lura”
Këmbëkryq qëndron me burra.
Ajo thotë veç të vërtetën
Mbron lirinë, nderin dhe jetën
Dhe godet çdo poshtërsi
Nuk është me asnjë parti.
Moj gazetë e Lurës sonë
Mos u ndal ti me jehonë
Nëpër rrugë e shpat më shpat
Hapi dyert kanat më kanat.
Hapi fletët porsi zambak
Shko e lajmëro në çdo prag
Se sa të ketë Lurë mbi dhe
Gjithë lurianët i ke atje…
Degë e rrënjë e lule bashkë
Dashuri në kockë e ashtë
Mirësi në gjak dhe gen
Krenari denbabaden…
Lurë moj o tokë mirësie
Në çdo gur himn krenarie
Në çdo lule, shpat më shpat
Dehet pjalmi nëpër fllad.
Dehet jeta gjithë aromë
Në çdo cep të Lurës sonë
Dhe gjithçka pasqyron gazeta
Ku nis puna e kulmon jeta…
Ku ka rrënjët historia
Ku frymoi me gjak liria
Ku ka shije buka e kripa
Ku kanë shije nata e dita…
Ku në çdo dru e në çdo gurë
Ka një bëmë, ka një flamur,
Ka një rrënjë, një histori,
Pasqyroi, moj gazetë ti!...
Pasqyroi moj gazetë “Lura”
Bëj ti vend ndër gra e burra
Hape zemrën në çdo vatër
Shteg më shteg e në çdo ngastër…
Ndize zjarrin thellë në zemra
Fute Lurën nëpër ëndrra
Farkëtoje ti historinë
Gen më gen e ke lirinë…
“Lura” jonë, gazetë për ne
Kudo që jemi mbi këtë dhe
Jemi vëllezër të një gjaku
Jemi bijë të një pragu…
Shkruani, shkruani o lurianë
Sillni shkrime anembanë
Le ta bëjmë gazetën “Lura”
Një tribunë që ngre veç ura…
Ku të kalojnë lurianët e mi
Mijëra vjet në histori
Nga Çezari tek Pomepeu
Këtu lindi vetë Anteu…
Këtu bëri banjë Teuta
Këtu s’reshti kurrë lufta
Këtu i ka rrënjët Iliria
Këtu nis gjithë Dardania…
Ndaj gazeta ka mission
Të ngrejë në qiell Lurën tonë
Historisë ti japë drejtim
Nga lashtësia në amëshim…
Të prek plagët tua Lurë
Dertet që ka çdo grua e burrë
T’ia ver dorën ledhatuese
Përmbi plagët acaruese…
Ndaj të duam moj gazetë
Ti je zani ynë i vërtetë
Je yllnajë e je tribunë
Histori që nuk vdes kurrë…
Rrite shtatin, “Lura” jonë
Ço mesazhe kudo që shkon
Ta bëjmë Lurën Kopësht Edeni
Krenari e gjithë këtij vendi…
