Trajektorja e diellit në vendlindje

Kultura

Trajektorja e diellit në vendlindje

Nga: Dibran Demaku Më: 15 gusht 2020 Në ora: 16:31
Dibran Demaku

Dielli nxjerr syrin mbi një sukë mali
në shtrat ende ëndërrojnë qupa e djali
Lan Brahimi me drapër e pret barin
Shaqir Alia vetë i teti e kosit livadhin
këmborë e dashit e zgjon mëngjesin
barinjtë delet në fushë i zbresin
tek burimi i lumit në mes pyelli
ëmbël ledhaton veshët një melodi fyelli
dikush me gëzim e fillon korrjen e arës
dikush e zgjedh dhe e siguron llojin e farës
nënat ngarendin pas punëve të shtëpisë
baballarët kuvendojnë nën hijen e lajthisë
rrezet e diellit pjekun piku i zhegut
barinjtë përfundojnë lojën në sukë të bregut
bagëtitë nën mrize bëjnë pushimin e mesditës
nëpër shtëpi shijohen rrathët e pitës
trajektorja e diellit anon nga perëndimi
sërish nisin punët pas një pushimi
bareshat luajnë lojën ma le ta lash
barinjtë në pushim loje tregojnë kashelash
ritmi i jetës rrjedh në stilin e vetë
disku i artë i diellit prapa malit zbret
hëna e nxjerr syrin mbi majë të malit
që të mund terrin t‘i ndris rrugën udhëtarit...

Sot mund të lexoni Shfletoni kopertinat