Ep i mallit për Itakën...
Mendimet shpesh tjerrin frikërat
e i mbledhin ankthet në boshtin e kohës,
për dhuratë Penelopave të reja
që thurin pëlhurat e durimit
në pritjet për bashkim
me Odisetë e rinj të kohëve moderne!
Çdo agim një poezi
Këndoj e dehem mëngjesit
me këngën e ëmbël të zogjve
që sjellin agimin në sqepa
e shkruaj për gëzimin
që rrjedh çurg
e zgjoj ata që e duan jetën
e i ndez mendimesh
për puthje qielli,toke,ajri,
për bekim dite
me bardhësi shpirti
me melodi deti...
Marjeta Shatro Rrapaj
Fshihet çasti...
Të paprekura,
mendimet e së shkuarës,
si kujtesa hermetike
në dritën e heshtjes,
ku vështrimet mblidhen lëmsh,
ku mbarojnë ngjarjet
e ku ndalojnë ëndrrat,
përtej mallit që nuk kalon
nuk ndodh asgjë.
Çasti i përket përjetësisë.
Malli i pritjes...
Jetuakemi edhe pa njëri-tjetrin
në anët e kundërta të kohës
si skaje kundërshtie
në kaltërsinë e largët
në pritje të shpërthimit të dritës
shkundur nga supet e diellit
në kërkim të lumturisë së çastit,
përtej erës...
"Turn off"
Virtualja,botë ireale
që tret ëndrrat e lindura çastit
e i kthen në pluhurin e së djeshmes
të hapësirës absurde të mendimeve të sëmura
të tronditura nga mëkati i pafaj i kohës së falur
në tjetërsimin e qenieve në lakuriqësinë e imazheve,
në zhveshjen e fjalëve,
në shpërfytyrimin e mitikes mashtruese,
në magjinë e lundrimit kibernetik,
venitur nga rrjedha e mundimeve
e maktheve të padukshme
ku merr fund ankthi dantesk
vetëm me "Turn off".
Marjeta Shatro Rrapaj
