Babai im e ka pasur një jetë të mirë
ishte i ndershëm
ndihmonte njerëz të njohur dhe të panjohur
ka qenë dhe partizan
patriot (qëndroi tetë vjet në ekzil)
burrë
baba dhe gjysh i mirë
Por në fund
numri i njerëzve që shkuan në varrimin e tij
u ndikua
nga temperatura nën zero
nga dëbora
dhe sepse njerëzit nuk kishin kurrfarë interesi
nga një plak i vdekur
I.
Binte shi
ditë melankolike në Rahovec
po e shikoja mantelin
e babait të varur në dollap
të cilit i ishte hapur dera
sikur po i mungonte babai im
i cili kishte vite i vdekur
Mall për të kisha edhe vetë
e fika cigaren
i shtrëngova dhëmbët
e vesha mantelin
dolëm
ecëm rrugës kryesore
deri te varri i tij
u lagëm që të dy
U kthyem dikur në shtëpi
mantelin e vara në ballkon
që të thahet
unë bëra ca meze
e mora një shishe
me rakinë që e kishte bërë
babai
dhe e piva
derisa më kishte zënë gjumi
ulur
Të nesërmen u ktheva në Meksikë
mantelin e mora me vete
në valixhe
Tash sa herë bie shi
e veshi
dhe dalim e shëtisim rrugëve
kah ka bredhur Kerouac-u
me shokë
por tash nuk lagemi
II.
Kur ziej kujtimet
herë pas here
ik brenda një flluske kohe
dhe aty
gjithmonë është ditë me diell
babai hyn në shtëpi
me një shalqi
ulet
dhe me nënën pinë kafe
ndërsa unë
sapo e pata përfunduar së lexuari
përrallën
në të cilën një bretk
shndërrohet në princ
pas puthjes së princeshës
Tamam nisin të më rriten
krahët e imagjinatës
vjen realiteti si plak
i mbështetur në një shkop
që e ka formën e pikëpyetjes
dhe e shpon flluskën
III.
I kujtoj prindërit e mi
duke e zbutur kafshatën e bukës
në plagë
të kriposur me kujtesë
në heshtje
në liri
në dhimbjet e lirisë
që ua shkaktonin njerëzit e lirë
të lirë deri në marrëzi
Ashtu i shoh edhe tani në qiell
nëna duke i ushqyer engjëjt jetimë
dhe duke u folur për mua dhe për djemtë e mi
tek i përkund
e babai duke i lexuar lajmet për Kosovën
duke i shikuar ato në TV-në qiellore
derisa ha mollë
ndërkohë duke e lodhur nënën time
me pyetjet e njëjta
kur vjen
a vonohet Xhevdeti
dhe nëna duke iu përgjigjur si gjithmonë
me zërin e saj të butë
po ti e di o Njeri
që ai gjithmonë është shumë i kujdesshëm
për këto gjëra
nuk vonohet
sapo ta përfundjë pijen me shokët
këtu do ta kemi
