Lajmi për vdekjen e studiuesit dhe hulumtuesit Mexhid Yvejsi nga Gjakova më preku pa masë, pasi që humba një shokë, mikë, dost, besimtar e atdhetar, mbi të gjitha njeriun me integritet dhe kredibilitet të lartë shkencor e intelektual. Ike shpejt, papritmas, edhe pse një ditë kush më herët e kush më vonë të gjithë ne jemi krijesa të Zotit dhe tek Zoti i plotfuqishëm do të kthehemi.
Sapo mora lajmin për vdekjen e tij, lexova Elhamin dhe bëra dua (lutje) që Krijuesi Fuqiplotë ta mëshirojë me mëshirën e tij të gjithëmbarshme shpirtin e tij të ndritur. Por si miku dhe shoku i tij më i përafërt kam obligim njerëzor e moral që ta përkujtoj me këtë shkrim post mortum (pas vdekjes), Mexhid Yvesjin.
Me studiuesin dhe hulumtuesin Mexhid Yvejsi u njoftova dhe u takova për herë të parë në vitin 1996, dhe prej atij çasti plot 25 vite e kam pas shokë dhe mikë në kuptim të plotë të fjalës, gjer në ditën e sotshme, datë 12.02.2021 kur e përcollëm në botën tjetër. Mexhid Yvejsi ka qenë njeri i urtë, i tërhequr, i qetë, por mbi të gjitha ishte njeri studjues dhe hulumtues që tërë jetën e vet e përkushtoi në lexim, studim, hulumtim, shkrim.
Shkrimtari Mexhid Yvejsi me krijimtari letrare filloi të merret qysh në moshën rinore dhe vazhdoi me vrull gjatë tërë jetës së tij. Krijimtaria e tij letrare përfshin një periudhë mbi 50 vjeçare, gjatë së cilës ka shkruar mbi 1000 punime dhe shkrime të ndryshme . Ka shkruar poezi, prozë, tregime, shkrime publicistike, hulumtime, studime, monografi, punime shkencore, etj.
Shkrimet e tij janë publikuar në të gjitha trojet shqiptare si dhe në diasporën shqiptare. Përveç krijimtarisë letrare merrej edhe me përkthime, ashtu që nga gjuha angleze ka përkthyer poezi, rrëfime dhe tregime të ndryshme. Ka botuar rreth 20 libra të fushave të ndryshme , e disa prej tyre janë ribotuar edhe për herë të dytë dhe të tretë. Prej tregimeve, rrëfimeve dhe poezive, disa prej tyre janë përkthyer në gjuhën angleze, boshnjake, turke, arabe dhe perse.
Mbi gjysmë shekulli në fillim me laps në dorë, pastaj makinë me shkrim, e në fund me llaptop në dorë, Mexhid Yvejsi ka shkruar, vetëm ka shkruar ditë e natë, sado pak për të udhëzuar, për të frymëzuar popullin e vet shqiptar, nga gjiri i të cilit lindi dhe i takonte me shpirt, me vepër, me guxim, me njohuri, me dije, me krijimtari. Gjatë jetës së tij ka lexuar rreth 15.000 libra në gjuhën shqipe, serbe, boshnjake, angleze. Biblioteka e tij personale përfshinte mbi 10.000 libra . Gjatë qëndrimit 10 vjeçar në Shtetet e Bashkuara të Amerikës(1971-1981) ka lexuar dhe tubuar rreth 5000 libra, të cilat i ka lënë atje, dhe me veti gjatë kthimit në Kosovë i ka marr vetëm 100 libra më të veçuara në gjuhën angleze.
Ka dhënë ndihmesë të jashtëzakonshme të gjithë atyre studentëve që i janë drejtuar me këshillat, konsulta, referenca, literaturë për punimet e tyre të diplomës, masterit apo disertacioneve të doktoraturës, nga fushat e ndryshme sikurse atyre letrare, fetare, historike, kulturore, etj.
Ka qenë një ndër intelektualët e rallë jo vetëm në Kosovë por edhe në trojet tjera shqiptare që ka dhënë një kontribut tejet të çmuar me shkrime, studime, hulumtuese, dhe lirisht mund të them që ka merituar të jetë jo vetëm anëtar i Akademisë së Shkencave dhe Arteve të Kosovës por edhe anëtar nderi i akademive tjera botërore.
Ka qenë një patriot dhe atdhetar i flaktë i cili qysh në moshën 18 vjeçare kur ishte ka shkruar trakte dhe parulla për statusin e Kosovës Republikë, si dhe ka pikturuar portretin e Skënderbeut në vitin 1968 me rastin e 500 vjetorit të vdekjes së Skënderbeut, në Urën e Fshejtë i cili portret edhe sot e kësaj dite qëndron në shkëmb pran urës.
Ka shumë për të shkruar për veprën dhe krijimtarinë letrare, studiuese, hulumtuese, të poetit, shkrimtarit, besimtarit dhe atdhetarit Mexhid Yvejsi nga Gjakova, shpresoj dhe besoj të kem shëndet e jetë për të shkruar më gjerësisht gjatë periudhës së ardhshme kohore për veprimtarin dhe jetën e Mexhid Yvejsit.
Në fund të këtij shkrimi post mortum (pas vdekjes) për shokun dhe mikun tim të shquar dhe të paharruar, Mexhid Yvejsi nga Gjakova do të përmbyll: Mexhid bej, jetove i qetë, i tërhequr në këtë botë të përkohshme, por ke lënë gjurmë të përhershme për kulturën tonë kombëtare e fetare të popullit tonë shqiptar.
Lus Krijuesin fuqiplotë të mëshirojë me mëshirën e tij të pakufishme dhe të të shpërblejë me xhenet(parajsë).
