Gazetarit nga Shqipëria s'i lejohet hyrja në Serbi përmes Kosovës

Lajme

Gazetarit nga Shqipëria s'i lejohet hyrja në Serbi përmes Kosovës

Më: 29 janar 2019 Në ora: 15:27
Foto ilustruese

Gazetari i ABC News, Armand Bajrami nuk lejohet që të kalojë nga pika kufitare e Merdarit, mes Kosovës dhe Serbisë, me pretendimin se ka hyrë ilegalisht. Ata nuk e njohin shtetin e Kosovës dhe për pasojë hyrja në këtë territor për gazetarin është bërë ilegalisht. Për gazetën Shqip, gazetari shprehet se është kthyer së bashku me 3 kolegë të tjerë dhe një juriste. Ata po shkonin në Nish për të marrë pjesë në një seminar.

Më pas gazetari ka shkuar në Serbi duke kaluar nëpërmjet Maqedonisë. Burokracia që ka ndodhur në pikën doganore të Merdarit, i ka shkaktuar 4-5 orë të tjera udhëtim dhe vonesa. Lajmi është bërë i ditur nga vetë Bajrami, i cili nëpërmjet një postimi në Facebook tregon atë që ka ngjarë.

Postimi në Facebook:

Të premten u bëra ilegal. Po mo, ilegal. Jo i rëndomte. Serioz. Mos mendoni “ti me ketë fytyre”. Me këtë fytyrë që kam u bëra. Ilegal mirëfilli. I padëshiruar. Kokë e këmbë injoruar.

Ilegaliteti im nisi ne pikëkalimin kufitar të Merdares mes Kosovës dhe Serbisë. Udhëtoja drejt Nishit. Policia kosovare na priti dhe nderoi si vëllezër, si trimi trimat. Madje një prej tyre guximshëm nuk e vonoi as një “friend request” në fb (jo mua). Por na thanë që s’hapej ajo derë për ne. “Mos o trima”, thanë.

Oficeret serbe s’u sollën keq. Na respektuan me fytyra të paqta e buzë në gaz. Pastaj na kthyen pas. Brenda a jashtë dëshirës personale (tonën apo të tyren) si trima vumë majat nga thembrat.

Se nuk e njohin Kosovën si shtet. Nuk duan të dinë se je nisur nga Shqipëria. U vret sytë vula e vene në pasaporte nga policia e Kosovës në Morinë. S’u interesoi as fakti që isha i ftuar në tokën e tyre. Për ta futja nga Kosova konsiderohej ilegale. Kurse unë.. ilegal. Ilegal komplet.

Nuk isha i vetëm. Kisha edhe tre vajza në makinë. Jolegale dolën dhe ato, por e pranuan që unë kisha një fare sqime në ilegalizëm. Një lloj sharmi dhe elegance. Ju druajtën performancës sime ilegaleske. Ndaj me lanë tek sedilja e tretë e furgonit. Pse?! Se prej ilegalit ca s’pret.

Udhëtimi u zgjat me 4-5 orë të tjera. Me biseda të ngrohta e histori ilegalësh sfiduam të ftohtin dhe deborën që s’ndalej. Dihet, klandestinët kanë vuajtjet e tyre. U desh t’i “faleshim” Maqedonisë për t'u legalizuar. Që atje kalimi në Serbi ishte loje fëmijësh.

Ne na u hoq “njolla”, po kush lexoi këto radhë duhet ta dijë që në Merdar nuk kalon dot. Nëse i drejtohet ka rrezik potencial ilegalizimi.

Ndërkohë diplomacia shqiptare ka stekë të lartë. Rreket të negocioje ndryshime kufijsh, të jetë e ndjeshme ndaj zhvillimeve në Venezuele dhe të bëjë faktorin e paqes e stabilitetit në rajon. Mire bën…

commentFirst article
Sot mund të lexoni Shfletoni kopertinat