Vuçiq i shkruan Trumpit, i tregon kur vazhdon dialogu

Lajme

Vuçiq i shkruan Trumpit, i tregon kur vazhdon dialogu

Më: 31 janar 2019 Në ora: 14:08
Presidenti i Serbisë, Aleksandar Vuçiq.

Presidenti i Serbisë, Aleksandar Vuçiq, tha se i ka shkruar letër presidentit të Shteteve të Bashkuara, Donald Trump, në të cilën, siç u shpreh, ka thënë se Beogradi është i gatshëm të vazhdojë dialogun për normalizimin e marrëdhënieve me Prishtinën "në momentin kur Kosova të heqë taksën" që u ka vënë prodhimeve të importuara nga Serbia.

"Në momentin kur Prishtina ta heqë këtë masë të paarsyeshme dhe të dëmshme, jemi të gatshëm të vazhdojmë dialogun në kërkim të një zgjidhjeje të qëndrueshme", thuhet në letrën që Vuçiq i ka dërguar Trumpit, në përgjigje të një letre që presidenti amerikan i ka dërguar atij më 14 dhjetor.

"Taksa e Prishtinës është ngarkesë dhe pengesë e pakapërcyeshme për rifillimin e dialogut, sepse jo vetëm që i sjell dëm ekonomisë serbe, por rrezikon edhe jetën e serbëve në Kosovë", thuhet në letrën e Vuçiqit, të cilën e transmeton agjencia serbe e lajmeve Beta.

Në dhjetor, Trump i ka shkruar letër edhe Vuçiqit, edhe presidentit të Kosovës, Hashim Thaçi, duke iu bërë thirrje që të angazhohen në dialog dhe në arritjen e një marrëveshjeje për normalizimin e marrëdhënieve.

Të martën, Thaçi bëri të ditur se i është përgjigjur letrës së Trumpit, duke u zotuar se do të punojë për marrëveshjen historike me Serbinë.

commentFirst article
Sot mund të lexoni Shfletoni kopertinat