Ministri i jashtëm serb, Ivica Daçiq, thotë se bashkësia ndërkombëtare nuk është e unifikuar në thirrjen e saj ndaj Prishtinës për të hequr taksën ndaj mallrave serbe dhe për këtë sipas tij, kjo taksë po vazhdon të mbijetojë.
Ai ka thënë se SHBA’të duan heqjen e taksës dhe vazhdimin e dialogut.
“Disa vende të BE’së janë duke i thënë Ramush Haradinajt që të mos e anulojë taksën”, ka thënë Daçiq për TV Pink serb.
Ai ka thënë se Mbretëria e Bashkuar ende nuk i ‘ka dënuar lëvizjet e fundit të Prishtinës”.
“Në Britani, sipas mendimin tonë, po e inkurajojnë Haradinajn që të mos e heq taksën, ata nuk e duan idenë e kompromisit dhe nuk u pëlqen të mos jenë faktor në këtë proces. Ata nuk mendojnë se ky problem duhet të zgjidhet. Ata duan që ne thjesht ta njohim pavarësinë e Kosovës”, ka thënë ai.
Ai ka thënë se ‘Prishtina me vendosjen e taksave dhe me Platformën e saj për dialog e ka ndalur këtë proces” që sipas Daçiqit mund të vazhdojë vetëm me heqjen e taksës.