(E plotësuar) - Ivica Daçiq, Ministri i Jashtëm i Serbisë sot ka folur në Këshillin e Sigurimit.
Daçiq ka thënë se në 7 muajt e parë të këtij viti ka pasur dëmtime të pronës së Kishës Serbe, dhe incidente ndaj serbëve në Kosovë.
Sipas Daçiqit, në raportin e vitit 2018 të Departamentit të Shtetit Amerikan thuhet se Kosova shumë etnike është bërë monoetnike
Daçiq ka bërë krahasimin e numrit të popullatës serbe në Kosovë tash dhe në vitin 1999
“Serbët në Kosovë kanë jetuar në 427 qyteza dhe fshatëra, tani jetojnë në më pak se 116 të tilla. 311 vendbanime ku ka pasur banorë serbë tashmë janë spastruar etnikisht dhe janë bërë shqiptarë”
Daçiq ka vazhduar me akuzat se shqiptarët në Kosovë kanë kryer gjenocid ndaj serbëve gjatë kohës së luftës.
“Spastrimi etnik i popullatës serbe dhe deportimi i 200 mijë serbëve është dëshmi e qartë e gjenocidit të shqiptarëve”
Ai ka vazhduar me krahasimin e numrit të banorëve mes vitit 1999 dhe tash nëpër qytetet e Kosovës.
Sipas Daçiqit, më shumë se 40 mijë serbë në Prishtinë kanë jetuar në vitin 1999, ndërsa sot numri është më pak se 100, kurse në vitin 1999 mbi 10 mijë serbë kanë jetuar në Prizren e tani janë vetëm 23 serbë.
Daçiq ka thënë se Gjykata Speciale duhet të zbardhë rastet e vrasjeve të serbëve të pafajshëm gjatë luftës.
“Dhoma e Prokurorisë Speciale kanë një punë të madhe të zbulojnë vrasjen e serbëve të pafajshëm në vitin 1999” është shprehur Ministri i Jashtëm i Serbisë
Daçiq përmend fotografinë e Brovinës në KS të OKB-së
Shefi i diplomacisë së Serbisë, Ivica Daçiq, nuk ka lënë pa përmendur fotografinë e prezantuar nga deputetja Flora Brovina kohë më parë në Kuvendin e Kosovës, e cila më vonë doli të jetë e rreme.
Ai ka thënë se fotografia ishte e bërë diku në Irak, dhe se me këtë janë ofenduar familjet e viktimave të dhunës.
“Serbia dënon çdo vepër të dhunës seksuale në çdo konflikt, por manipulimi me shifrat dëmton procesin e pajtimit, pasi pala shqiptare flitet për 20 mijë shqiptarë të përdhunuar”, u shpreh ai, duke shtuar se numri është shumë më i ulët sipas shifrave të OKB-së.
