Gjyqtari Adem Shabani pas deklarimit të të akuzuarit Ekrem Mustafa ia caktoj afatin ligjor prej 30 ditësh për kundërshtimin e provave para caktimit të shqyrtimit gjyqësor.
Ministri i Punëve të Brendshme, Ekrem Mustafa është deklaruar i pafajshëm ndaj akuzës se kishte goditur auto ambulancën duke shkaktuar rrezikim të trafikut publik.
Ai e ka shprehur qëndrimin e tij sot kur është paraqitur para trupit gjykues.
Sipas aktakuzës së prokurorisë, Ekrem Mustafa më 23 prill 2014 rreth orës 16:20 në magjistralen Ferizaj – Prishtinë, në fshatin Prelez, duke drejtuar automjetin nga pakujdesia ka rrezikuar trafikun publik dhe jetën e njerëzve.
Prokuroria thotë se përveç dëmeve materiale në katër automjete, lëndime të rënda trupore kanë pasuar dy persona dhe një tjetër kishte pësuar lëndime të lehta.
Mbrojtësi i ministrit, avokati Visar Vehapi duke iu përgjigjur prokurorit të shtetit Avdullah Abedini, ka deklaruar se prokuroria nuk i ka dërguar atij kopjen e deklaratave të dëshmitarëve të cilët i ka propozuar si dhe nuk është në dijeni nëse ata janë marrë në pyetje nga prokuroria ose policia.
Gjyqtari Adem Shabani, të akuzuarit Ekrem Mustafa i caktoj afatin ligjor 30 ditë për kundërshtim të provave si dhe sjelljen e provave të reja dhe pas kësaj të caktohet shqyrtimi gjyqësor.
