Këngëtarja Adelina Ismaili, që ka qenë aktive në fushatën për zgjedhje parlamentare të Kosovës, sot ka folur pak para se të hyjë në qendrën e votimit të saj.
Para shkollës fillore “Dardania” në Prishtinë, Adelina thotë se po e sheh një qetësi në këtë ditë të zgjedhjeve, ndryshe nga më parë.
“Një kohë të gjatë nuk kam qenë në Kosovë. Mund ta vërejë që është një qetësi e lezetshme. Po më pëlqen kjo këtë herë”, ka thënë Ismaili.
Sipas saj, pjesëmarrja më e madhe në zgjedhje, krahasuar me zgjedhjet e mëhershme, për të tregon se njerëzit po duan ndryshim.
“Po pres ndryshim. Vetë pjesëmarrja e madhe në zgjedhje tregon se njerëzit duan ndryshim. Na duhet një ndryshim radikal”, thotë Ismaili.
Ndërkaq ajo nuk ka përmendur emra për shkak të heshtjes së zgjedhjeve megjithatë u ka kujtuar të gjithëve se qëndrimi i saj në këto zgjedhje dihet.
“Ne nuk jemi dorëzu, ju i dini qëndrimet e mia. Na duhet një femër në krye të shtetit”.
