Gazeta britanike The Guardian dhe ajo austriake Der Standard në shkrimet e tyre, pasi Peter Handke u laureua me çmimin Nobel sot nga Akademia Suedeze, ia kanë përmendur shkrimtarit kontrovers austriak fjalimin në varrimin e Sllobodan Milloshevqit dhe sentimentin proserb. Der Standard e cila sjell reagimin edhe të institucioneve austriake, ka publikuar edhe reagimin e vetë Handkes, i cili pak vite më parë kishte qëndruar edhe në Kosovë.
“A është kjo e vërtetë?”, ka pyetur Handke në gjermanisht pasi Anders Olsson, kryesues i Komitetit të Nobelit, e ka telefonuar atë për t’i treguar se është fitues i çmimit prestigjioz ndërkombëtar që vitin e kaluar nuk ishte dhënë fare për shkak të një skandali seksual.
“Ai ishte shumë, shumë i prekur, mezi e nxori një fjalë nga goja”, ka thënë Olsson.
The Guardian, ndërkaq, ka publikuar reagimin e ambasadores së Kosovës në SHBA, Vlora Çitaku, e cila e ka quajtur të turpshëm dhe skandaloz vendimin e Nobelit.
Në Austri, ndërkaq, janë gëzuar. Presidenti Alexander Van der Bellen ka shkruar: “Çfarë dite! Një ditë e gëzuar – për letërsinë austriake…”.
“Urime Peter Handkes për Çmimin Nobel për Letërsi. Puna e tij është e vlefshme dhe një vizitëkartë e rëndësishme për Austrinë në botë”, ka shkruar kancelari Sebastian Kurz që ka publikuar edhe një fotografi me të.
Po ashtu, për këtë çmimin ka reaguar edhe Ministria austriake e Kulturës.
Në vitin 2006, Peter Handke mori pjesë në funeralin e ish-liderit serb dhe të dyshuarit për krime lufte, Slobodan Millosheviqit, një figurë të cilin ai e simpatizonte pavarësisht akuzave që kishte për gjenocid.
Shkrimtari austriak një herë kishte mohuar masakrën serbe në Srebrenicë.
Pasi Peter Handke përshkroi bombardimin e Serbisë nga NATO si krim lufte, ai ishte sulmuar nga politikanët dhe mediat, një periudhë që ai e përshkroi në librin e tij “Udhëtimi nga Dugout, ose shfaqja për filmin e luftës”.
Në vitin 2006, pas kritikave për pjesëmarrjen në funeralin e Slobodan Millosheviqit, nominimi i Peter Handkes për çmimin Heinrich Heine prej 50 mijë eurove ishte anuluar nga këshilli i qytetit të Dyseldorfit. Shkrimtari më pas kishte thënë se nuk do ta pranonte çmimin. Anëtarë të ansamblit të Berlinit e quajtën anulimin e çmimit si “sulm ndaj lirisë artistike” dhe iniciuan “Çmimi Heinrich Heine Berlin” që arriti të grumbullonte të njëjtat të holla, por që Peter Handke nuk i pranoi, duke kërkuar që të hollat të dhurohen për enklavat serbe në Kosovë.
