Avokati Arianit Koci, i cili njihet edhe si dashamir i kafshëve, ka reaguar pas publikimit të fotos së Luanit i cili është duke u mbajtur në një kafaz shumë të vogël në një restorant në Zhegër të Gjilanit në mesin e kafshëve të egra.
Ai përmes një postimi në facebook, ka thënë se urgjentisht sonte duhet të filloi procedura e konfiskimit të luanit - dhe të vazhdohet me procedurën e ekstradimit në ndonjë azil, duke theksuar se “Ka Evropa azile për Luaj”
Ja postimi i plotë:
“Luani i Gjilanit si po e quajnë kollokvialisht, është importuar në kundërshtim me nenin 10 të Ligji Nr. 02/L-10 PËR PËRKUJDESJEN NDAJ KAFSHËVE, i cili në mënyrë eksplicite e ndalon importimin, shitjen apo mbarështimin e kafshëve agresive, që mund të paraqesin rrezik për sigurinë dhe shëndetin e njeriut apo kafshëve tjera.
Për më tepër, në shikim të parë po shihet që kafsha e egër po mbahet në kushte të tmerrshme - në një kafaz që nuk ka hapësirë të mjaftueshme as për një qen!
Krejt kjo po bëhet haptazi, në sy të publikut, AVUK -ut dhe policisë.
Urgjentisht, sonte duhet të filloi procedura e konfiskimit të luanit - dhe të vazhdohet me procedurën e ekstradimit në ndonjë azil.
Ka Evropa azile për Luaj!
Përndryshe, një rast i ngjashëm ka ndodhur në Shqipëri.
Luani është ekstraduar në Holandë, por nuk ka mbijetuar gjatë. Ka qenë shumë i abuzuar.
P.s.
Luani mund t’i falet ndonjë kopshti zoologjik, nëse veç nuk e merr ndonjë azil i luanëve!”, ka shkruar avokati Arianit Koci.