Në pikën kufitare me Shqipërinë në Vërmicë po lejohen hyrja e qytetarëve, atyre po i kryhen vetëm kontrollet mjekësore, ndërsa asnjë dokument apo procedura tjetër nuk po u kërkohet.
Ndonëse në vendimin e qeverisë së kaluar u saktësua që qytetarët që duan të hyjnë në Kosovë, duhet të posedojnë rezultate negative për testin Covid-19, jo më i vjetër se katër ditë, një gjë e tillë nuk u pa që është duke u zbatuar në pikën kufitare në Vërmicë.
Media sot ka qëndruar gjatë ditës në këtë pikë kufitare ku nuk vërehej fluks i madh i automjeteve as në hyrje por as në dalje të Kosovës.
Ferdije Elshani e cila po kthehej në Kosovë nga Shqipëria, tha se për të kaluar kufirin nuk u është kërkuar ndonjë dokument apo formular i veçantë që tregon për gjendjen e tyre shëndetësore.
Ajo thotë se kanë kryer kontrollet mjekësore.
Elshani: Kemi kryer kontrollet mjekësore
“Jo përkundrazi shumë mirë na kanë pritur... asnjë gjë konkrete nuk ka pasur”, tha ajo.
Edhe Kreshnik Miftari, qytetar i Prishtinës, thotë se përveç kontrolleve mjekësore dhe të dhënat personale nuk është kërkuar diçka tjetër.
Miftari: Më kanë matur temperaturën
“Vetëm na kanë shti me e matë temperaturën, na e kanë marrë emrin dhe mbiemrin ku keni qenë dhe ku po shkoni”, tha ai.
Sipas Thoma Pravaliqi shoferë i maunës në këtë pikë kufitare gjithçka është nën kontroll.
Ai thotë qarkullimi i mauneve në këtë pikë është lehtësuar edhe pas largimit për masën për dezinfektim të kamionëve.
Pravaliqi: Situata është shumë e stabilizuar
“Çdo gjë është nën kontroll, situata është shumë e stabilizuar, kontrollet bëhen, nuk kemi as vonesa, asnjë gjë... sigurisht po edhe ajo e ka lehtësuar shumë”, tha ai.
Vendimi për mbylljen e kufijve ishte vendosur nga autoritetet e Kosovës më 13 mars të këtij viti në kuadër të shumë masave parandaluese të mundësisë së përhapjes së COVID-19.
Kufijtë tokësor në Kosovë janë hapur që nga 1 qershori.
