Shefi i Misionit të Organizatës së Kombeve të Bashkuara në Kosovë, Zahir Tanin, ka reaguar pas dorëheqjes së sotme të katër kryetarëve të komunave veriore, duke bërë thirrje kundër eskalimit të situatës në atë pjesë të Republikës së Kosovës.
"Jam duke përcjellur me shqetësim serioz ngjarjet e fundit që kulminuan sot me dorëheqjet e shpallura nga kryetarët e katër komunave veriore”, ka thënë Tanin.
Ai ka folur edhe njëherë për taksën prej 100 për qind të vendosur ndaj produkteve serbe, dhe ka bërë thirrje që një penalizim i tillë të hiqet.
“Veprimet e tilla paraqesin shkelje të qartë të marrëveshjes CEFTA dhe duhet të tërhiqen”, ka shtuar ndër të tjera ai.
Tanin ka bërë thirrje të gjitha palëve që t’iu shmangen provokimeve që do të mund të rrisin tensionet në veri.
“Ju bëri thirrje udhëheqësve nga të gjitha palët të demonstrojnë përmbajtje më të madhe dhe t’i shmangen çfarëdo provokimi tjetër që do të mund të rrezikonte mundësinë e normalizimit të raporteve dhe potencialisht të rriste tensionet”, ka përfunduar Tanin.
Kryeministri Haradinaj ndërkohë ka thënë se për këtë çështje do të flas nesër.
