BABË E BIR
-Myzhde babë!
-Fol bir!
-U rrëzua qeveria!
-He mos u qoftë ma o bir!
-Përse babë?!
-Si pse bir?! Po çka bani kjo qeveri mire? Përveç se trashi barqet dhe qafët e atyre të vetëve!
-Por, ti babë vetë ke thënë se si që nuk është për veti, nuk është për ngjeti!
-Por, jo kështu deri në këtë mas bir! Kështu çka ban këta nuk ban as hasmi!
-E ke gabim babë! Kjo ishte qeveria jonë! Vetë e kishim zgjedhur!
-Unë jo qe besa, mor bir! Nashta ti ke votue për ta se unë - jo kurrë!
-Por, vendi nuk bën të mbetet pa qeveri, Babë!
-Hajt bir se e ban zoti mirë!...
-Myzhde babë!
-Fol bir!
-Presidenti i kishte thirrë në takim liderët e partive politike, për të caktuar datën e zgjedhjeve të reja!
-Kush asht ai?!
-Presidenti babë, kryetari i shtetit!
-A, kryetari?!...Po pse nuk thue kështu bre bir!
-I kishte thirrë, pra, liderët e partive politike që bashkë të caktonin ditën për zgjedhje të reja!
-Këta të vjetrit a?!
-Po, babë!
-S`kjeka gja!
-Si s`qenka babë?! Do të ketë zgjedhje të reja! Do të zgjidhen deputetë të rinj. Pastaj do të bëhet Parlamenti. Qeveria!
-Me këta të vjetrit
-Po babë me të vjetrit!
-Pse a nuk ka të rinj, kjo Kosovë e shkretë, po gjithmonë me të vjetrit?!
-Kosova ka shumë të rinj babë, por ata nuk janë të angazhuar në parti politike. Nuk merren me politikë!
-S`kjeka gja kjo punë o bir! Po të ishin të mire këta të vjetrit, atëherë pse i rrxun!
-Po thonë, babë se do të ketë një fillim të ri në politikën e Kosovës!
-Ishalla more bir bahet ashtu si thua ti! Vetëm të vjetrit të sjellin diçka të re, unë nuk kam ni ndonjëherë!
-A, s`ka hiç shpresë, babë?!
-Valla, more bir me këta unë s`kam ymyt hiç!
-Dhe çfarë duhet të bëjmë atëherë ne?!
-Na, more bir, duhet të flemë sonte, sepse nesër do të zgjohemi herët dhe duhet të shkojmë në arë. Atje na pret puna, na pret ara!...
