Një arkitekt me një dashuri të madhe për bimët e gjelbra e ka shndërruar shtëpinë e të tij në qytet në një ‘pyll’, pas viteve të mbledhjes së bimëve të rralla dhe të pazakonshme.
Jason Chongue nga Melbourne i Australisë, ka një koleksion mahnitës me gjelbërim me më shumë se 400 bimë që janë bërë pjesë e dekorit.
Me pak hapësirë në natyrë për të punuar, arkitekti 32 vjeçar solli kopshtin e tij brenda – dhe që atëherë ka mbushur çdo cep të shtëpisë së tij me bimë në vazo dhe të varura të të gjitha formave dhe madhësive.
“Numërimi i fundit ishte mbi 400 bimë brenda dhe jashtë ka shumë më shumë”, tha Jason për Daily Mail Australia.
“Mbushja e shtëpisë time me bimë ishte një rezultat organik i mungesës së hapësirës së jashtme të mjaftueshme për të ushqyer fiksimin tim të kopshtarisë”.
“Kur jetoni në një komunitet të dendur urban, hapësira e jashtme vjen me një çmim më të lartë, kështu që përgjigjja ishte kopshtari në ambiente të mbyllura. Ka kaq shumë bimë të brendshme që mund të lulëzojnë në botën tonë të brendshme”, shton ai.
Mania e tij me bimët filloi organikisht kur ai ndihmoi prindërit dhe gjyshërit e tij me kopshtarinë në një ‘moshë shumë të re’.
“Unë isha i dashuruar me natyrën dhe gjelbërimin, nga bimët te kafshët shtëpiake isha i fiksuar. Unë do t’i kaloja ditët e mia në kopsht, duke u rritur dhe eksperimentuar me gjithçka që më vinte në dorë”, tha ai.
“Gjatë viteve unë kam eksploruar një sërë llojesh dhe specie bimësh, ndërsa koleksioni është rritur dhe evoluar. Disa bimë që kam me vete tani janë nga fëmijëria ime, ndërsa të tjerat janë shtesa dhe të tjerat janë transferuar tek unë”.
“Obsesioni im me bimët vjen nga pasioni im për gjelbërimin dhe mënyrën se si bimët mund të bëjnë ndryshim në hapësirat tona të jetesës”, përfundon Jason.
