Vendimi i Parlamentit të Maqedonisë për ndryshimin e emrit është imponuar nga jashtë dhe nuk pasqyron vullnetin e popullit, njoftoi sot Ministria e Jashtme ruse, me përfundimin se kjo çështje duhet të shqyrtohet nga Këshilli i Sigurimit i OKB.
"Ajo që ne shohim është vazhdimi i procesit të ndryshimit artificial të emrit të shtetit të imponuar nga jashtë me qëllim që Shkupi të bashkohet me NATO sa më shpejt që të jetë e mundur," thuhet në kumtesë.
Ministria e Jashtme ruse kujton se më 11 janar Parlamenti i Maqedonisë votoi për të miratuar ndryshimet kushtetuese mbi ndryshimin e emrit të vendit në përputhje me marrëveshjen e Prespës.
"Me këtë është shkelur ligji i Maqedonisë. Pozita e presidentit të Republikës së Maqedonisë dhe opinioni i shumicës së popullsisë, që hedhin poshtë Marrëveshjen e Prespës, nuk merren parasysh ", thekson MPJ.
Në njoftim gjithashtu tërhiqet vëmendja për vazhdimin e tubimeve të protestës në Shkup dhe qyteteve të tjera maqedonase, që thuhet se është një tregues i polarizimit të thellë të shoqërisë.
"Është e qartë se kjo metodë e zgjidhjes së çështjeve me rëndësi kombëtare për të ardhmen e vendit nuk pasqyron vullnetin e popullit të saj dhe nuk mund të shërbejë si një instrument për një zgjidhje afatgjatë të problemit të emrit të vendit", thuhet në komunikatën për media.