Avdullah Hoti, deputet i LDK-së shkruan se shqiptarët tani janë bërë faktor përcaktues i zhvillimeve politike në Ballkan dhe mundësuan zgjedhjen e një qeverie që merr parasysh interesat e shqiptarëve, duke siguruar kështu stabilitetin e shtetit të Maqedonisë.
Postimi i plotë
GJUHA SHQIPE ZYRTARIZOHET NË MAQEDONI - Kjo është një arritje e madhe për stabilitetin e shtetit të Maqedonisë. Përgëzime për forcat politike shqiptare në Maqedoni për këtë arritje.
Shqiptarët tani janë bërë faktor përcaktues i zhvillimeve politike në Ballkan. Në Maqedoni shqiptarët mundësuan zgjedhjen e një qeverie që merr parasysh interesat e shqiptarëve, duke siguruar kështu stabilitetin e shtetit të Maqedonisë. Në Mal të Zi, në zgjedhjet e fundit parlamentare shqiptarët ishin përcaktues për fitoren e forcave politike pro evropiane dhe pro NATO, duke ndaluar kapjen e këtij shteti nga politika ruse.
Në anën tjetër, me Shqipërinë në NATO dhe drejt BE-së, si dhe me Kosovën e pavarur që ka orientim të qartë euro-atlantik, shqiptarët nuk kanë qenë asnjëherë në pozitë më të volitshme historikisht.
Kjo fuqi politike e shqiptarëve duhet të shfrytëzohet: (i) për ruajtjen e stabilitetit dhe paqes në rajonin e Ballkanit Perëndimor, si dhe (ii) për ruajtjen e orientimit pro-perëndimor të të gjithë Ballkanit Perëndimor dhe integrimin më të shpejtë në BE të këtij rajoni si tërësi.
BE-ja duhet ta shfrytëzoj këtë orientim të palëkundur pro evropian të shqiptarëve kudo që janë në Ballkan për ta integruar sa më parë këtë rajon në familjen e madhe evropiane.
