Ministri i Punëve të Brendshme të Maqedonisë, Oliver Spasovski, sot ka vizituar stacionin policor në Vallandovë, prej ku deklaroi se gjendja e sigurisë në vend është përmirësuar, duke ju referuar anketës së fundit të OSBE-së, sipas së cilës 75 për qind e qytetarëve të Maqedonisë ndjehen të sigurt.
Spasovski foli edhe për kushtet e zyrtarëve policorë, për të cilët tha se gjatë kohës së udhëheqjes së tij me Ministrinë e Punëve të Brendshme ka ndërmarrë aktivitete konkrete për përmirësimin e statusit të policëve.
“Përmirësimi i statusit dhe kushteve të punës, janë interesi jonë i përbashkët, pasi logjika është e thjeshtë – vetëm polici i kënaqur është polic profesional dhe efikas”, tha Spasovski.
Ai shtoi se për blerjen e uniformave të reja të policëve janë paraparë rreth 200 milionë denarë, ndërsa shtoi se do të ketë edhe rritje të pagave për pesë për qind.
