Me mbi 55.000 vota të fituara më shumë nga kundër kandidatja për presidente, e mbështetur nga LSDM-ja dhe koalicioni, Stevo Pendarovski mbrëmë shpalli fitore pas publikimit të rezultateve në rrethin e dytë të zgjedhjeve presidenciale. Zakonisht, urimet nga tabori kundërshtar mungojnë. Pendarovski mbrëmë tha se nuk ka marrë urime nga kundër kandidatët. Urimet e para për zgjedhjen e tij për president në llogarinë e tij erdhën nga presidenti i Republikës së Shqipërisë, Ilir Meta dhe nga eurokomisari për zgjerim, Johanes Han.
Sot, tha Pendarovski, fituan qytetarët dhe solemnisht dua të njoftoj se do t’u shërbej me përkushtim të gjithëve, do të jem president i shtetit nga i cili nuk do të turpëroheni.
“Në këto zgjedhje vendosët të vazhdojmë së bashku përpara. Sot ishte Maqedonia jonë dinjitoze, populli ynë i mençur, kjo është fitorja e shumicës së qytetarëve të Republikës së Maqedonisë së veriut të cilët pavarësisht të përkatësisë etnike apo politike u bashkuan dhe tha vazhdojmë përpara dhe asnjëherë dhe kurrë më regjim. Sot fituan qytetarët dhe solemnisht dua të publikoj se do t’u shërbej me përkushtim të gjithëve”, theksoi Pendarovski.
Rezultati i zgjedhjeve, theksoi, është sukses i madh sepse këto zgjedhje janë fitore të bashkimit dhe unitetit. Unë bashkohem në udhëheqjen në këtë shtet për Republikën e Maqedoninë së Veriut euroatlantike. Do të angazhohem për një shtet juridik dhe do të qëndroj pas çdo qytetari të ndershëm, do të bashkoj nuk do të ndaj. Do të jem faktor i stabilitetit, e jo faktor i krizave. Iu falënderua kryeministrit Zoran Zaev dhe të gjithë Qeverisë si të 31 partive politike, të cilët, siç tha, të gjithë së bashku qëndrojnë pas këtij koncepti. Falënderim të veçantë i dërgoi Gordana Siljanovskës dhe Blerim Rekës për pjesëmarrjen dhe kontributin në zgjedhjet demokratike.
Kryeministri dhe lider i LSDM-së, Zoran Zaev, në fjalimin e tij theksoi se patëm zgjedhje të suksesshme dhe demokratike dhe fituam një president evropian të shtetit.
“Stevo Pendarovski është president i të gjithëve. Me zgjedhje shumë të pastra në të dyja raundet e zgjedhjeve treguam se Republika e Maqedonisë së Veriut ka kapacitete të mëdha demokratike dhe se është e gatshme për në Evropë. Kjo është fitorja e qytetarëve dhe e Republikës, porositi sonte. Prej sot asnjë nuk mund të qëndrojë në rrugën e progresit dhe të perspektivave. Rezultati i zgjedhjeve të sotme tregoi se së bashku shkojmë përpara në NATO dhe në BE. Jehoi përcaktimi i shumicës së qytetarëve në zgjedhje të pastra, korrekte dhe demokratike. Vazhdojmë së bashku dhe me përgjegjësi përpara”, ka thënë Zaev në fjalimin e tij në selinë e partisë ku morën pjesë edhe përfaqësues të udhëheqësisë së BDI-së.
Së bashku theksoi, treguam se kemi një vend evropian dhe një popull krenar i cili ka përcaktime evropiane.
“Si pushtet qendror dhe lokal në bashkëpunim me presidentin e ri mbesim të përkushtuar në prioritetet tona, anëtare e plotfuqishme e NATO-s dhe fillim të negociatave me BE-në, vazhdojmë t’i orientojmë paratë tek qytetarët, i mënjanojmë dobësitë në qeverisje të cilat shkaktuan reagim tek opinioni, vendosim fund përfundimtar në ndarjet dhe së bashku ndërtojmë bashkim brenda dhe aleancë jashtë”, premtoi Zaev.
Në pyetje të gazetarëve prej ku do të fillojë “fshesa”, sipas leksionit të marrë nga qytetarët, Zaev paralajmëroi korrigjim të të gjitha dobësive dhe ndryshime serioze në pushtetin ekzekutiv, ndërsa do të fillojnë, tha, në radhët e LSDM-së.
Për Pendarovskin, rezultati i zgjedhjeve është një konfirmim i qartë i shumicës së qytetarëve dhe vullnetit të tyre për ta mbështetur Marrëveshjen e Prespës dhe rrugën euroatlantike të vendit.
Lideri i VMRO-DPMNE-së, Hristijan Mickoski, megjithatë mbrëmë pas kumtimit të rezultateve tha se Gordana Siljanovska Davkova më 5 maj ka humbur së bashku me popullin vetëm me një falsifikim të rëndë ose me inxhinieri zgjedhore.
“Sot patëm parregullsi, shantazhe, kanosje, presione, me siguri edhe gishtërinj të shpejtë dhe indikacione për blerje. Këto nuk janë vlera evropiane, as vlera të qytetarëve të Maqedonisë sepse qytetarët nuk janë të tillë. Këtë nuk e them për të kërkuar alibi, por sepse është e vërteta për realitetin në Maqedoni. Nuk premtoj diçka që nuk mund ta realizoj dhe t them – ky pushtet është i vetëdijshëm se tani më është i kaluar dhe do të dështojë”, ka thënë Mickoski sipas të cilit rezultati është i pazarllëqeve, ndërsa pushtet është delegjitimituar.
Kandidatja për presidente e përkrahur nga VMRO-DPMNE dhe koalicioni Gordana Siljanovska -Davkova në pres konferencë në selinë e partisë opozitare pas publikimit të rezultateve të para të zgjedhjeve e ka pranuar humbjen, por nuk e ka uruar hapur fitoren e kundërkandidati, Stevo Pendarovski.
Ajo ka thënë se mjafton që ka pranuar humbjen dhe se gjithçka që ka ndodhur në debatet gjatë fushatës nuk pritet nga ajo me admirim t’i drejtohet. Thekson se nuk bëhet fjalë për mungesë të kulturës politike.
“Numrat flasin për humbje. Thjeshtë të mundurit nuk ndjehen mirë, por unë nuk jam ndjerë më e qetë, më e pasur”, ka thënë Siljanovska duke falënderuar përkrahësit për mbështetjen, duke theksuar se ka marrë mirëkuptim dhe energji të madhe nga qytetarët.
Sipas të dhënave të KSHZ-së nga mbi 98 për qind e votave të numëruara, ose 3.436 vendvotimeve, Pendarovski ka fituar 423.292 vota ose 51.83 për qind, derisa kundërkandidatja Gordana Siljanovska Davkova ka marrë 363.980 ose 44.57 për qind.
