Diplomati i lartë amerikan viziton Shkupin dhe Athinën - Bota Sot
Diplomati i lartë amerikan viziton Shkupin dhe Athinën

Maqedonia

Diplomati i lartë amerikan viziton Shkupin dhe Athinën

Më: 22 korrik 2019 Në ora: 08:13
Ndihmës sekretari amerikan i Shtetit, Philip Reeker

Ndihmës sekretari amerikan i Shtetit, Philip Reeker, viziton Greqinë dhe Maqedoninë e Veriut, njoftoi Departamenti amerikan i Shtetit.

Ai do të qëndrojë në Shkup dhe Athinë më 21 deri më 27 korrik, ku do të takojë zyrtarë qeveritarë, shoqërinë civile dhe udhëheqës biznesi.

“Në Shkup, Reeker do të takohet me presidentin, Stevo Pendarovski, kryeministrin, Zoran Zaev, ministrin e Jashtëm, Nikola Dimitrov dhe anëtarë tjerë të qeverisë për të diskutuar çështjet dypalëshe dhe rrugën e Maqedonisë së Veriut drejt anëtarësimit në NATO dhe BE”, thuhet në njoftimin e Departamentit të Shtetit.

Ndërkaq, në Athinë, gjithnjë sipas këtij njoftimi, diplomati i lartë amerikan, do të takohet me ministrin e jashtëm, Nikos Dendias, dhe udhëheqësit e tjerë të qeverisë për të diskutuar çështje thelbësore për marrëdhëniet dypalëshe duke përfshirë tregtinë dhe investimet, bashkëpunimin për sigurinë dhe mbrojtjen, stabilitetin rajonal dhe energjinë.

Marrëveshja historike ndërmjet Shkupit dhe Athinës për çështjen e mosmarrëveshjes dekadëshe për emrin e Maqedonisë së Veriut, është vlerësuar lartë nga administrata amerikane, dhe e njëjta është përdorur edhe si shembull për zgjidhjen e problemeve tjera në rajon.

Kjo marrëveshje i hapi rrugë anëtarësimit të Maqedonisë së Veriut në NATO dhe BE.

Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...