Kryetari i Bashkisë së Shkupit, Petre Shilegov tha se deklarata e kryetarit të Komunës së Sarajit, Blerim Bexheti që ndaj tij ka pasur presion që të rrënohet vetëm një nga tre platformat e Matkës, në mënyrë që opinioni të shohë diçka janë pjesërisht të sakta.
“Unë kërkova të rrënohet platforma që u nis të ndërtohet këtë vit, e për çka kryetari i Komunës së Sarajit deklaronte se ka qenë aty dhe se ka rikonstruim. Në fakt, reagimi në opinion, reagimi i shkupjanëve, ishte pikërisht për atë e platformë. Për këtë shkak e thirra Bexhetin tek unë në kabinet dhe nga ai kërkova që platforma të prishet”, tha Shilegov.
Për deklaratat e Bexhetit se do të caktojë referendum nëse Qeveria i merr kompetencat për Matkën, Shilegov thotë se nuk mund Komuna e Sarajit të caktojë referendum rreth kompetencave të Matkës për shkak se kjo është pasuri natyrore që i përket gjithë qytetarëve.
“Matka është pasuri natyrore që i përket gjithë qytetarëve. Zgjidhja për të cilën angazhohem është që Bashkua, komuna dhe shteti të menaxhojnë me Matkën. Zgjidhja ligjore në të cilën punojmë është që të mbrohet dhe të mos varet nga kryetari i Bashkisë së Shkupit dhe kryetarit të Komunës së Sarajit por të jetë e mbrojtur në mënyrë institucionale si pasuri natyrore. Nuk mund t’i monopolizoni punët, paramendoni të caktoj unë referendum për lumin Vardar apo kryetari i Komunës së Gostivarit ta bëjë këtë për shkak se burimi është në territorin e tij. Është resurs që i përket të gjithëve”, tha Shilegov.
