Presidenti i Shqipërisë, Ilir Meta uroi Presidentin e Republikës së Maqedonisë së Veriut, Stevo Pendarovski dhe të gjithë qytetarët e vendit me rastin e Ditës së Pavarësisë.
“Më lejoni me kënaqësi të veçantë në emrin tim dhe në emër të popullit shqiptar t’ju bëj urime të sinqerta dhe përshëndetje të ngrohta vëllazërore për ju dhe të gjithë qytetarët tuaj. Jam i bindur që falë vullnetit, përvojës dhe vizionit tuaj marrëdhëniet e shkëlqyera fqinjësore dhe bashkëpunimi që ekzistojnë midis vendeve dhe popujve tanë do të vazhdojnë të forcohen edhe në të ardhmen”, thuhet në urimin e Metës.
Ai theksoi se thellimi i marrëdhënieve midis dy vendeve ka pasur dhe ka përmirësim të vazhdueshëm në marrëdhëniet ndëretnike.
“Jemi krenarë për kontributin e jashtëzakonshëm që shqiptarët në Maqedoninë së Veriut kanë dhënë për stabilitetin e vendit dhe integrimet euroatlantike. Jam i bindur që komuniteti maqedonas në vendin tonë do të vazhdojë të jetë një urë e fortë miqësie dhe bashkëpunimi midis dy vendeve dhe popujve tanë”, thuhet në mesazh.
