Asociacioni i Gazetarëve të Maqedonisë (AGM) e dënon propozimin e ministrit Robert Popovski, i cili u mbështet nga qeveria, për të përkrahur me 50 milionë denarë mediumet e shtypura.
Nga AGM thonë se ky vendim është diskriminues, pasi sipas tyre, favorizohen dhe financohen mediumet e shtypura, ndërsa diskriminohen televizionet dhe portalet.
Sipas AGM, bëhet fjalë për korrupsion klasik ndaj të gjithë mediumeve dhe ndikim i drejtpërdrejtë mbi politikën redaktuese të gazetave.
“Se bëhet fjalë për sjellje korruptive tregon edhe fakti se qeveria nga buxheti, financon vetëm mediumet e formatit të cilat as tek ne, as në Evropë nuk kanë rëndësi të madhe mediatike, në krahasim me mediumet elektronike dhe ato digjitale”, thonë nga AGM.
Ata shtojnë se ky harxhim nuk ka asnjë arsyetim.
