Organizohen artistët dhe biznesmenët e Maqedonisë: Shqipëria ka nevojë për ne tani, t’i ndihmojmë

Maqedonia

Organizohen artistët dhe biznesmenët e Maqedonisë: Shqipëria ka nevojë për ne tani, t’i ndihmojmë

Më: 28 nëntor 2019 Në ora: 13:58
Foto

Dhjetëra artistë dhe biznesmenë, nën moton #PrayForAlbania u mblodhën sot në Shkup për të dhënë ndihma të cilat për destinancion kanë Shqipërinë dhe njerëzit e prekur nga tërmeti.

Ata njëkohësisht bënë thirrje të gjithë qytetarëve të Maqedonisë që të solidarizohen me ngjarjet e fundit në Shqipëri dhe të kontribuojnë për personat e prekur nga tërmeti tragjik.

Me organizimin dhe mbledhjen e mjeteve do të merret Kryqi i Kuq i Maqedonisë së Veriut. Drejtori i këtij institucioni, Sait Saiti tha se tash më janë nisur disa mjete nga Maqedonia për në Shqipëri. Megjithatë, sipas tij ajo për të cilën tani Shqipëria ka nevojë janë mjetet financiare, me qëllim, rimëkëmbjen sa më të shpejtë të zonave të dëmtuara,-Maqedoni.

Sait Saiti, Drejtor i Kryqit të Kuq të Maqedonisë

Ai tha se periudha në vazhdim do të jetë më e vështirë, në kuptim të asaj që do të duhen më shumë mjete financiare për rindërtimin e banesave dhe shtëpive, si dhe sajimin e të dëmeve të mëdha materiale që ka shkaktuar tërmeti në Shqipëri.

Mes të pranishmëve ishin artistët: Ajtuna Sejdiu (Tuna), Bejsana Kasami (Big Mama), Mimoza Shkodra, Lori, Fifi, Adnan Daci dhe shumë të tjerë. Si një nga iniciatorët ishte edhe biznesmeni i njohur Enver Maliqi, ndërsa fjalë rasti iu dha edhe kryetarit të Odës Ekonomike të Maqedonisë Veri Perëndimore, Nebi Hoxha, i cili njoftoi që bashkë me biznesmenët shqiptarë kanë arritur të mbledhin mbi 100 mijë euro, mjete këta për të cilat ai u zotua se do përfundojnë në duart e nevojtarëve në Shqipëri.

Vetëm nga numri i telefonit 143400 qytetarët e Maqedonisë deri tani kanë dhuruar mbi 40 mijë euro. Mjete higjienike, ushqime dhe veshmbathje janë nisur që dje për në Shqipëri. Qytetarët të cilët nuk kanë mundësi që të ndihmojnë përmes xhirollogarisë (300000001327966 Komercijalna Banka AD Skopje) apo numrit të telefonit (070/075/077 143400), ndihmat mund t’i dorëzojnë edhe fizikisht nëpër qendrat e Kryqit të Kuq të Maqedonisë që janë funksionale në 33 komuna.

Sot mund të lexoni Shfletoni kopertinat