Ministri i Arsimit dhe Shkencës Arbër Ademi, sot në konferencë për shtyp tha se pagat në arsim janë rritur për më shumë se 21 përqind. Ai këtë e quajti arritje historike, duke thënë se janë krenar.
Ademi tha se fokusi i BDI-së në arsim do të jetë edhe në periudhën vijuese.
“Me përkrahjen tuaj, BDI arriti të realizojë programin e vet në tërësi, atë që e themi, atë e bëjmë dhe ju falënderojmë për besimin e dhënë. Brenda një periudhë dyvjeçare pagat e mësimdhënësve në shkollat fillore dhe të mesme janë rritur për mbi 21%. Kjo është një rritje historike dhe ne mburremi për këtë fakt. Rritja e parë e pagave për mësimdhënësit ishte në shtator të vitit 2018 edhe atë për 5%, kurse në shtator të vitit të kaluar po aq u rritën pagat – pra 5%, kurse rritja e tretë e pagave prej 10% është realizuar sivjet, në janar të vitit 2020”, tha Arbër Ademi.
Ndërsa i pyetur nga gazetarët në lidhje me zgjedhjet e parakohshme të 12 prillit, ai tha se BDI pret që të ketë fushatë dhe zgjedhje fer dhe demokratike.
“Ne presim fushatë të qetë dhe zgjedhje demokratike, ndërsa jemi maksimalisht të fokusuar në fitoren e radhës të BDI-së. Çdo herë kur BDI ka qenë në pushtet janë organizuar zgjedhje demokratike, pa incidente dhe rezultatet kanë qenë të pranueshme nga të gjithë pjesëmarrësit”, tha Ademi.
Ai theksoi se partia akoma bënë analiza, për atë se kush do të jetë pjesë e listave për deputetë.
“Po bëhen analiza të thella si çdoherë dhe partia do t’i propozojë kandidatët më të mirë, të cilët në mënyrë dinjitoze do t’i përfaqësojnë shqiptarët”, tha Ademi.
