Sot përmbyllet procesi 3-ditor i votimit për zgjedhjet e parakohshme parlamentare në Maqedoninë e Veriut. Procesi është zhvilluar pa incidente dhe qytetarët kërkojnë nga qeveria e re, integrim në Bashkimin Evropian dhe një ekonomi më të mirë.
Deri mesditën e së mërkurën zyrtarisht nuk janë paraqitur parregullsi, por sektori civil ka evidentuar disa shkelje në vendvotime të ndryshme, mes te cilave cenimi i fshehtësisë së votës. Qytetarët do të mund të votojnë deri në orën 21:00, ndërsa më pas Komisioni Shtetëror i Zgjedhjeve do fillojë numërimin dhe shpalljen e fituesit.
Arben Taravari nga Aleanca për Shqiptarët thotë se presin rezultat më të mirë se sa Bashkimi Demokratik për Integrim në mënyrë që partia e Ali Ahmetit të mos jetë më në pushtet pas 18 vitesh. Ai tha se ka pasur incidente të vogla, por nuk është përsëritur fenomen i mbushjes së kutive.
“Ka pasur incident të vogla si kanosjes, presion dhe blerje votash. Shumicën e rasteve i kemi evidentuar dhe i kemi dërguar tek organet kompetente dhe ndërkombëtarët. Deri tani nuk ka pasur mbushje të kutive, gjë e cila ka ndodhur deri tani”, tha z. Taravari.
“Këto 10 vite e fundit, pjesa shqiptare është zbrazur pasi shumica kanë ikur në mërgim. Janë larguar gati 30 mijë shqiptarë dhe shumica prej tyre nuk janë kthyer për të votuar. Ka rreth 10-20% më pak dalje të shqiptarëve në zgjedhje më pak se sa maqedonasit.
“Presim që Aleanca për Shqiptarët dhe Alternativa të ketë 2-3 deputetë më shumë se sa BDI dhe pjesë e qeverisë së ardhshme të jetë Aleancë për Shqiptarët, të ndodhi një ndryshim pas 18 vjetëve qeverisje të BDI-së”, përfundoi z. Taravari.