Ministri i Shëndetësisë, Venko Filipçe dhe ministrja e Arsimit dhe Shkencës, Mila Carovska, sot në takim me përfaqësuesit e Unionit të nxënësve të shkollave të mesme thanë se mësimi në gjysmëvjetorin e dytë vazhdon me të njëjtat masa dhe rekomandime si dhe më parë.
Sipas Ministrisë së Shëndetësisë, në takim u theksua se në gjysmën e dytë të vitit, mësimi në shkollat fillore dhe të mesme vazhdon të zhvillohet në mënyrë onlajn. Përjashtim nga kjo bëjnë nxënësit nga klasa e parë deri në të tretën që ndjekin mësimet me prani fizike në klasë, në përputhje me kapacitetin e shkollave për të zbatuar planin dhe protokollet e Ministrisë së Arsimit dhe Shkencës dhe me miratimin e prindërve.
“Ne jemi duke e monitoruar situatën epidemiologjike dhe nëse në muajt e ardhshëm tregon stabilizim, ne do të marrim vendime të tjera, por kjo do të ndodhë pasi të jemi të sigurt se do të vazhdoj tendenca e zvogëlimit të të sapoinfektuarve me COVID-19”, tha Filipçe.
