Kryeministri Zoran Zaev nuk do të takohet me liderin e VMRO-DPMNE-së opozitare, Hristijan Mickoski, në lidhje me ndryshimet kushtetuese për Marrëveshjen e Prespës, çka përvijon qartë tashmë skenarin e zgjedhjeve të parakohshme parlamentare në Maqedoni.
Mediat maqedonase citojnë një zyrtar të lartë të qeverisë të pohojë se Zaev dhe partia e tij LSDM nuk kanë për qëllim që të bindin me çdo kusht Mickoskin dhe deputetët e VMRO-DPMNE-së që të votojnë amendamentet kushtetuese. “Nuk e synojmë medoemos një takim të tij me Mickoskin”, citohet të ketë thënë zyrtari në fjalë.
“Bëhemi gati për zgjedhje sepse duket që nuk do të bëhet asgjë në Kuvend”, ka shtuar ai.
Kreu i opozitës deklaroi pas referendumit të së dielës se marrëveshja e emrit me Greqinë është “e vdekur”. Që kur u mësua rezultati i votimit, shefi i ekzekutivit e la të kuptohej se zgjedhjet e reja janë për të një mundësi në tryezë, por partnerët e vet të koalicionit nuk ndajnë të njëjtin mendim dhe këmbëngulin të shfrytëzohen të gjitha mekanizmat që procesi të kalojë me sukses përmes ligjvënësve.
Aktualisht, shumica parlamentare në Maqedoni ka vetëm 71 vota nga 80 që nevojiten për zbatimin e marrëveshjes dhe që kjo e fundit të kalojë, do të duhen edhe 9 vota të opozitës. Ajo që e vështirëson edhe më shumë situatën është përçarja e thellë e shoqërisë në të ashtuquajturën “patriote” dhe “tradhtare”. Polarizimin e pat nxitur qeveria e mëparshme nën kryetarin e atëhershëm të VMRO-DPMNE-së, Nikola Gruevski dhe të njëjtën retorikë ndjek edhe pasardhësi i tij Mickoski.
Në rastin e zgjedhjeve të parakohshme, partitë që e mbështesin marrëveshjen me Greqinë duhet të arrijnë një mazhorancë prej dy të tretash në Parlament, që të mund të miratojnë pa pengesa ndryshimet kushtetuese.
