Kanceri i gjirit është një prej sëmundjeve kanceroze te gratë, por edhe shkaktari më i shpeshtë i vdekjes te gratë e moshës 45-55 vjeç. Rëndësia e zbulimit të hershëm është një faktor shumë me rëndësi në parandalimin e kësaj sëmundje dhe kjo sidomos mund të bëhet te femrat e reja. Në Klinikën e Onkologjisë në Shkup, dr. Ilir Ismaili thotë për koha, se pacientja e tij më e re është një vajzë 18 vjeçare e diagnostifikuar me kancerin në gji, por gjendja e saj është stabilizuar dhe vazhdon të kurohet.
Në Maqedoni ka rritje të numrit të prekur nga karcinomi në gji. Për një vit paraqiten mbi 700 raste, por ndërgjegjësimi i grave për kontroll ndikon në diagnostifikimin e hershëm të sëmundjes.
“Fatkeqësisht viteve e fundit kemi një tendencë në rritje të numrit të rasteve të rejave të karcinomit të gjëndrës së gjirit. Statistikat thonë se në vit kemi rreth 750 raste të reja të diagnostifikuara me këtë sëmundje. Por në anën tjetër kemi edhe një tendencë të vetëdijesimit të popullatës për shkak të interesimit të mediave që të informojnë pacientët me repartet për kontroll të sëmundjeve malinje, në përgjithësi, dhe të karcinomit të gjirit, në veçanti”, nënvizon onkologu Ismaili.
Ai saktëson se Maqedonia është lider i standardeve dhe kushteve më të mira në rajon, ndonëse për ta arritur nivelin evropian duhet edhe shumë punë.
Sipas onkologut, çdo grua duhet të bëjë kontrolle duke përfshi ehon, një ose dy herë në vit, pas moshës 25 vjeçare, kurse pas moshës 35 vjeçare deri në 40 vjeçare të fillohet me skrining ose mamografi, çdo dy deri tre vjet. Këto metoda tregojnë nëse ka ndonjë problem, ndryshim apo jo, ndërsa çdo ndryshim duhet të verifikohet me citopunkcion, për të zvogëluar numrin e biopsive të panevojshme.
Nga shoqata për luftën kundër kancerit “Borka – për çdo ditë të re”, thonë për gazetën Koha se në Maqedoni ka kushte për shërimin nga kanceri në gji, mirëpo duhet të vazhdohet të trajtohet me më siguri pacienti, terapitë e reja të vendosen në listën pozitive. Nga kjo shoqatë thuhet se 1 në 8 gra mund të diagnostikohen me kancer të gjirit në një fazë të caktuar të jetës së tyre.
Në Maqedoni, shkalla e vdekshmërisë së kancerit të gjirit është ende më e lartë në krahasim me vendet e BE-së. Falë zbulimit në kohë dhe trajtimit të duhur, gjithnjë e më shumë gra mund të shërohen tërësisht dhe të provojnë se kanceri i gjirit, si sfidat e tjera të jetës, mund të tejkalohet. Marshi “Përpara Rozë” është një ngjarje unike e kësaj që mbahet në muajin tetor, si muaji i luftës së kancerit në gji, që organizohet nga shoqata Borka në bashkëpunim me Ambasadën e Amerikës.
Bashkimi i të gjithëve që kanë përjetuar këtë sëmundje, miqtë e tyre, si dhe të gjithë qytetarët e Maqedonisë, me qëllim të ngritjes së vetëdijes për luftën kundër kancerit të gjirit. Ky është funksioni i këtij marshi dhe apelohet që të bëhet pjesë çdo qytetar në këtë nismë, të ecin së bashku për atë që luftojnë, për atë që besojnë, për atë që u duhet shpresë dhe mbështetje, po edhe për nder të atyre që humbën. Ky marsh, kundër kancerit në gji do të mbahet më 7 tetor, në Shkup.
