Draft-amendamentet për ndryshimin e Kushtetutës së Maqedonisë, sipas paralajmërimeve deri në fund të kësaj jave do të dorëzohen në Kuvend.
Kryetari i Kuvendit Talat Xhaferi, shpresoi se qeveria do t’i përshpejtojë afatet dhe deri të premten do t’i dorëzojë amendametet që të njëjtit të fillojnë të shqyrtohen,
Ai tha se deputetët e opozitës të cilët dhanë mbështetje për ndryshimet kushtetuese, këtë e kanë bërë sipas vullnetit të tyre dhe kanë hapur perspektivën evropiane për Maqedoninë. Xhaferi nuk përjashtoi mundësinë që deri në fund të procesit të rritet numri i deputetëve që do të mbështesin ndryshimet kushtetuese.
Edhe kryeministri Zoran Zaev njoftoi se deri të premten amendamentet do të dorëzohen në Kuvend. Pas takimit me grupin e deputetëve që mbështetën ndryshimet kushtetuese, tha se në amendamente mund të vendosen edhe kërkesat e tyre për përmirësimin e marrëveshjes.
Ndërsa zv.kryeministri për Çështje Evropiane, Bujar Osmani, mbrëmë tha se Marrëveshja e Ohrit është zgjidhje multietnike për Maqedoninë dhe se kjo duhet të vendoset në preambulën e Kushtetutës.