Arbana, Jonida dhe Bora konfirmojnë lidhjet me djemtë më të rinj, si rigjetën dashurinë pas divorceve të bujshme

Mediale Vip

Arbana, Jonida dhe Bora konfirmojnë lidhjet me djemtë më të rinj, si rigjetën dashurinë pas divorceve të bujshme

Më: 10 korrik 2019 Në ora: 17:39
Arbana Osmani, Eduart Grishaj, Jonida Maliqi, Romeo Veshaj, Bora Zemani dhe Donald Veshaj

Janë tri vajza ekrani, tashmë nëna djemsh nga martesat e tyre disavjeçare që përfunduan me divorc. Sikur ta kishin lënë me fjalë, Arbana Osmani, Jonida Maliqi dhe Bora Zemani në të njëjtën kohë kanë konfirmuar lidhjet e tyre të reja të dashurisë, secila në mënyrën e saj.

E para ishte moderatorja e “Dua të të bëj të lumtur”, e cila pas shumë e shumë lajmeve se tashmë është në një lidhje me regjisorin e programit të saj Eduart Grishaj, më në fund vendos të dalë hapur, vendim që e mori me publikimin e një fotoje çift nga Barcelona, ku po pushojnë. Që në momentin që u përfol për një lidhje të mundshme mes moderatores dhe regjisorit, ata kapeshin “mat” duke bërë komplimente apo duke lënë fjalë romantike nëpër komentet që i bënin njëri-tjetrit në profilet e tyre në “Instagram”.

Ndërkohë, nuk mungonin as fotot e tyre bashkë, por gjithmonë nën justifikimin se ata janë kolegë. Së fundmi, Arbana ka pranuar në mënyrën më të bukur se është në një lidhje me regjisorin. Ajo ka publikuar për herë të parë një “selfie”, ku shfaqet së bashku me Eduartin teksa ndodhen me pushime në Barcelonë.

Çifti po pushon në Barcelonë bashkë me stafin e emisionit, si një dhuratë nga vetë Arbana me mbylljen me sukses të sezonit. Ndërkohë, në foton e publikuar nga Arbana, ata shfaqen të buzëqeshur dhe duken të lumtur pranë njëri-tjetrit. Por kujtojmë se komplimentet dhe fjalët e bukura janë të pranishme në komentet e shumta që i lënë njëri-tjetrit teksa publikojnë foto në “Instagram”.

Eduarti ka publikuar prej kohësh foto vetëm me Arbanën. Ndërsa kjo e fundit ka publikuar për herë të parë një “selfie” me regjisorin e programit, duke pranuar ndoshta indirekt lidhjen e aq përfolur në media.

Po ashtu, edhe këngëtarja Jonida Maliqi ka konfirmuar lidhjen e saj me aktorin e “Al Pazar”, Romeo Veshaj, por në mënyrën më të guximshme të mundshme. Prej disa muajsh, këngëtarja Jonida Maliqi dhe aktori i humorit përfliteshin për një romancë, të cilën nuk e kanë mohuar.

Ata nuk kanë pranuar të flasin për këtë, por një video e tyre nga pishina dhe shumë të përqafuar, pak ditë më parë, bëri të gjithë të mendonin se thashethemet janë të vërteta. Edhe pas kësaj video, ata nuk preferuan të flisnin, duket se këtë surprizë e kishin rezervuar për puntatën e parë të emisionit më të ri në “Tring” me titull “Treshat”.

Romeo, Donaldi dhe Bora Zemani nisën programin dhe e ftuara e parë ishte pikërisht Jonida. Në promon e emisionit, Bora e pyeti Jonidën nëse beson në dashurinë e vërtetë dhe më pas në një tjetër sekuencë Jonida shihet duke u puthur në ekran me Romeon. Por në këtë program nuk ishte vetëm Jonida që vulos lidhjen e saj me Romeon.

Edhe prezantuesja e emisionit, e cila i dha fund lidhjes disavjeçare me Dj. Vin Velin, ka vendosur ta bëjë konfirmimin e historisë së re të dashurisë në emision. Prej muajsh përflitet se ajo dhe aktori që na ka bërë gjithnjë të qeshim me batutat e tij, Donald Veshaj, janë në një lidhje. Bora, Donaldi dhe Romeo ishin të ftuar në “Tring Stars” për të folur për projektin e ri që i bëri bashkë në televizion.

Teksa zbuluan shumë rreth emisionit të tyre, gjatë intervistës ranë në sy ngacmimet që Donaldi i bënte Borës. Fillimisht, Donaldi i përmendi Borës këmbët e lyera me krem shkëlqyes dhe moderatorja i bashkoi këmbët e saj me të tij. Ndërsa Romeo i bëri shumë komplimente ‘kunatës’, duke thënë se ajo është jo vetëm shumë e bukur, por edhe prezanton shumë mirë dhe ka ide të mira.

Pas kësaj, Bora e falenderoi Romeon duke i dhuruar një puthje në faqe. Ndërsa Donaldi si për të konfirmuar që ata nuk janë thjesht kolegë, tha: “E kemi mikeshë familjare”. Le të shohim nëse pas këtyre konfirmimeve, Arbana, Jonida dhe Bora do të nisin të rrëfejnë dashuritë e tyre në programe televizive.

commentFirst article
Sot mund të lexoni Shfletoni kopertinat