Mozzik reagon pas kritikave për turneun e promovimit të albumit nëpër disa qytete të Kosovës.
Reperi Mozzik gjatë ditës së sotme ka nisur turneun promovues për albumin e ri “Mozzart”.
Ai po vitziton disa qytete të Kosovës me një autobus, ku takon nga afër fansat dhe u dhuron atyre nga një CD të albumit, falas.
Këtë turne ai e nisi në Mitrovicë e Vushtrri, ku u prit nga një numër i madh fansash, të cilët ishin grumbulluar për ta takuar nga afër atë.
Për ta parë Mozzikun, të rinjtë ishin grumbulluar pa distancë, e disa prej tyre edhe pa maska, pavarësisht rrezikut të infektimit me COVID-19.
Reperi është kritikuar se po rrezikon shëndetin e qytetarëve, duke organizuar tubime të tilla gjatë kësaj periudhe.
Pas gjithë kësaj, Mozzik reagoi përmes disa postimeve, ku lut qytetarët që në vazhdim të turneut në qytetet e tjera, të vendosin maska dhe akuzon mediet për gënjeshtër.
“Ju kisha lute qytetet e radhes, te mbani maskat te gjithe edhe distancen ta mbani! Ju lutem! T’i respektojme masat! lutje”, shkruan ai.
Ndërsa, në postimin tjetër ai u revoltua ndaj medieve, ku shkruan “Qaq t’pa afte jeni ju mediat qe shkruni tituj palidhje e rrena, as ni lajm nuk ishte qe doli albumi im, e tash po shkruni kishe po rrezikoj te rinjet e shendetin e qytetareve! #Gazetat #Mediat Tmerri i Rrenav e Mashtrusve jeni ju”.
Kujtojmë se Mozzik në këtë turne shkoi me përcjellje të një eskorte të policisë.
