“E drejtpërdrejtë, e vërtetë, shumë e ndjeshme”, me këto tri fjalë e përshkroi veten e saj, moderatorja dhe gazetarja e njohur Fiori Dardha, në intervistën me revistën Class, dy vite më parë.
Fiori në gjithë karrierën e saj, ka ndërtuar imazhin e gazetares pa filtra, me humor të hollë dhe plot energji.
Së fundmi, ajo ka dhënë një intervistë në emisionin “Natën me Aulonën”, ku tregon për herë të parë se vuan nga një sëmundje autoimmune.
Fiori rrëfen se ka ditë që janë shumë të vështira për të, por sërish ajo ka forcë ta përballojë vetëm, pa shqetësuar askënd tjetër.
“Prej dy vitesh kam zbuluar që vuaj nga një sëmundje autoimune që më dëmton mëlçinë dhe fillimisht duke ditur rëndësinë e këtij organi, u tremba shumë. Sot jam mësuar të bashkëjetoj me këtë sëmundje. Shpesh e sfidoj, ndonjëherë i bëj edhe karshillëk. Padyshim që ndonjëherë përpiqet edhe të më mundë, zë edhe krevatin, por nuk ia tregoj njeriu. Askush nuk ma ka për borxh të dëgjojë dërdëllitjet e ankesat e mia. Nuk e di për sa kohë do arrij ta sfidoj, por për aq kohë sa mundem do bëj të pamundurën të jetoj shëndetshëm dhe ta shpërfill sa mundem pavarësisht se jam në kontakt të vazhdueshëm me mjekun tim”, u shpreh Fiori.
Nëpërmjet këtij rrefimi ajo ka arritur të përcjellë një mesazh mjaft të mirë për të gjithë ata që mund të vuajnë nga një sëmundje: nuk duhet të dorëzohesh! Kështu si Fiori, duhet bërë e pamundura për të jetuar shëndetshëm dhe për ta shpërfillur ‘atë’ që sulmon trupin tënd. Pavarësisht sëmundjes, sekreti për t’u shëruar qendron edhe në forcën mendore.
“Unë jam një qaramane profesioniste. Kjo është një mënyrë që kam gjetur për t’u mbrojtur nga faktorët e jashtëm. Për këtë, më ka ndihmuar shumë edhe sëmundja nga e cila unë vuaj. Trupi ynë krijon antikorpe që ne të na mbrojë nga rreziqet që na vijnë nga jashtë dhe kur krijon më shumë antitrupa se sa organizmi ka nevojë, zakonisht njerëzit vuajnë nga një sëmundje autoimune siç është edhe rasti im. Për këtë dua të them që sëmundja më ka ndihmuar që të njëjtën gjë të krijoj edhe në jetë. Kam krijuar një lloj mburoje që të më ndihmojë nga rreziqet nga jashtë. Kur me sheh fillimisht thua “sa grua e fortë, bravo i qoftë përballon gjithçka”, ndërkohë që unë përjetoj gjithçka, thjesht nuk i jap kënaqësinë që të më shohin në gjendje jo fort të mirë. Ndonjëherë e bëj për të mbrojtur familjen time, ndonjëherë veten time. Është njësoj siç funksionon organizmi im”,- është shprehur ajo.
