Ish-Miss Kosova, Zana Krasniqi, ka bërë të ditur tash e sa kohë se ka zhvendosur aktivitetin e saj edhe si aktiviste për mbrojtjen e natyrës.
Në rrjetet sociale, ajo promovon vazhdimisht aktivitete, të cilat u japin hapësirë temave të gjelbra, në tentim për ta kthyer vendin në një ambient ekologjik.
Mu për këtë arsye, ajo vendosi që në ditëlindjen e saj, të mbjellë plot 33 fidane – aktivitet ky të cilin e zhvilloi në Parkun e Velanisë te Kompleksi Memorial.
Krasniqi ndau me ndjekësit e saj në Instagram disa imazhe nga ky aktivitet, ku tha se 33 drunjtë e mbjellë përfaqësojnë plot 33 vitet e jetës së saj.
“Çdo ditëlindje është e bukur, por kjo e sotmja për mua ishte më e veçantë . Në parkun e Velanisë “Kompleksi Memorial” kam mbjellur 33 drunjë, nga një për secilin vit të jetës time. Të gjithë ne duam të jetojmë në një mjedis të pastër, por për të arritur këtë qëllim duhet të bashkohemi. Dhurata më e mirë për mua këtë vit, është vetëdisimi i të gjithëve për rëndësinë e mjedisit dhe përkrahja juaj në rrugëtimin tim për ruajtjen e mjedisit”, ka shkruar Zana në Instagram.
Këtë vit, bukuroshja e zgjedhur dikur “Miss Kosova” i është futur edhe garës për asambliste të Komunës së Prishtinës, nga radhët e Lëvizjes Vetëvendosje.
