Këngëtari i njohur Hysni Zeqiri, në një intervistë ekskluzive për gazetën “Bota sot”, ka folur për karrierën e tij në muzikë edhe në fushën e aktrimit. Në detaje ka folur edhe për lansimin e këngës së tij më të re së bashku me video klipin. Po ashtu, ai ka folur edhe për sfidat me të cilat përballet ai si një këngëtar i mirëfilltë me muzikën dhe këngëtarët të cilët merren më komercializëm.
“Bota sot”: Fillimisht urime për këngën “Të pres” dhe realizimin e videoklipit, cilat janë përshtypjet e publikut për këtë projekt?
Hysni Zeqiri : Nga ato sa kam pas mundësi të dëgjoj dhe nga mesazhet që kam marr, vlerësimet kanë qenë të mira.
“Bota sot”: Si erdhi deri te ideja për realizimin e kësaj kënge?
Hysni Zeqiri: Pas shumë bisedimeve me Ilir Tolajn, autorin e këngës, vendosëm që të sjellim një baladë, kërkesa ime ishte që mos të jetë baladë nga të zakonshmet dhe për këtë pjesë Iliri njihet si mjeshtër.
“Bota sot”: Sa jeni ndarë të kënaqur me punën e bashkëpunëtorëve me të cilët e keni realizuar projektin?
Hysni Zeqiri: Në këtë këngë janë të gjithë miq të vjetër, bashkëpunëtor prej vitesh, ata i njohin kërkesat e mia dhe sa më shumë që punonim aq më shumë lidheshim me këngën dhe donim edhe më shumë përkushtim. Mendoj që jo vetëm autorët e këngës, pra Ilir Tolaj në këngë e Ilir Maçastena në tekst, por edhe Berati ka bë një punë të jashtëzakonshme në video, gjë që u vlerësua edhe nga publiku.
“Bota sot”: Ku i keni realizuar xhirimet e videoklipit?
Hysni Zeqiri: Xhirimet janë realizuar në Zvicër!
“Bota sot”: Përse zgjodhët këtë vend?
Hysni Zeqiri: Ishte kërkesë e imja që të xhirojmë në Zvicër, doja vende të përshtatshme për idenë që kishim, besoj që kemi arrit të nxjerrim më të bukurën.
“Bota sot”: Përse zgjodhe që ta realizosh klipin në këtë formë, ku i vetmi personazh i fabulës je ti?
Hysni Zeqiri: Unë nuk kënaqem me gjëra shkel e shko. Gjëja e parë është tregimi, doja që kjo këngë të ketë një tregim në vete, nuk e shihja një femër pjesë të këtij skenari ku personazhi kryesor e luan pritjen. Duhet ta mësojmë publikun ta shoh videon si art e jo si reklamë ku femrat tregojnë linja e fustane. Balada të jep këtë mundësi të krijosh një mini film, nëse do të bësh art.
“Bota sot”: A keni ndonjë plan tjetër për këtë vit apo do ta përmbyllni vetëm me baladën “Të pres”?
Hysni Zeqiri: Ky vit ishte me plot punë, sollëm 3 këngë dhe me „Te pres“ u përmbyll.
“Bota sot”: Njiheni si këngëtar që lufton për ruajtjen e vlerave artistike në përgjithësi, sa është e vështirë kjo në një ambient të përfshirë nga komercializmi?
Hysni Zeqiri: Realisht është goxha e vështirë, për fatin e keq janë shumë faktor që kanë sjell këtë gjendje, po më së paku fajtor është dëgjuesi. Po e marr si shembull projektin tim të fundit, ku nga njerëzit e artit është vlerësuar shumë lart, po nga shumë njerëz të mediave nuk i është dhënë hapësirë as të promovohet, kjo si pasoj e shumë analfabeteve të vendosur në ato pozita, e që falë tyre publikut i ofrohet më shumë antivlera, u ofrohet banalitet, u ofrohen lajme të llojllojshme, dikush duke qenë pjesë e klaneve të tyre, dikush duke paguar hapësirën me para.
Gjithsesi faleminderit atyre pak gazetarëve që me mish e me shpirt mundohen të mbrojnë të mirën dhe bëjnë punën e tyre me shumë nder.
“Bota sot”: Si e vlerësoni gjendjen në artin dhe kulturën shqiptare aktualisht?
Hysni Zeqiri: Është një lëmsh edhe pse ka njerëz që punojnë gjëra të mira, shumica e ka mundur këtë pakicën që duan art, kjo shihet më së miri me top listat e serialet që janë shumë aktual, e që janë çdo gjë pos art e vlerë s'ka në to.
“Bota sot”: A ke menduar t`i kthehesh pjesëmarrjes në festivale?
Hysni Zeqiri: Tani për tani jo, nuk ka festivale, janë më shumë koncerte, një formë e mirë biznesi për organizator. Një festival që ka mbi 5 këngë nga një autor, aty nuk mbetet vend për garë është thjesht një hapësirë e mirë për promovim këngësh.
“Bota sot”: Ju jeni edhe aktor, keni menduar të hyni edhe në botën e aktrimit dhe filmit?
Hysni Zeqiri: Aktrimi është më vështirë, duhet ndjek audicionet, duhet më shumë kohë për arsye se është punë në ekip, pra është më e vështirë për me u marr me aktrim, por që një ditë do jem sigurt në aktrim më i përkushtuar.
“Bota sot”: Të kalojmë pak tek jeta personale, kënd po e pret Hysi?
Hysni Zeqiri: Po pres me u bë mirë, në shumë gjëra.
“Bota sot”: Çfarë planesh ke për të ardhmen?
Hysni Zeqiri: Për vitin që vjen kam disa plane, pra punët veç kanë filluar, njëherë duhen ide se çka do sjellim e si do duhet të jenë, po ka edhe diçka që do jetë shumë e veçantë, nëse nuk e realizoj ashtu si duhet s'do e publikoj, pra është më shumë se veç thjesht një këngë, shpresoj të bëhet!
