Bahtiri merr vendim për ndalimin e drekave dhe darkave zyrtare të drejtorive komunale - Bota Sot
Bahtiri merr vendim për ndalimin e drekave dhe darkave zyrtare të drejtorive komunale

Mitrovica

Bahtiri merr vendim për ndalimin e drekave dhe darkave zyrtare të drejtorive komunale

Më: 29 qershor 2020 Në ora: 15:19
Foto nga takimi

Nën udhëheqjen e kryetarit, Agim Bahtiri, sot është mbajtur mbledhja e radhës e Bordit të Drejtorëve, në të cilën u shqyrtuan çështje të ndryshme nga fushëveprimi i Bordit, që janë me interes për qytetarët e Mitrovicës.

Fillimisht në këtë mbledhje është diskutuar lidhur me Raportin e Auditimit për pasqyrat financiare të Komunës së Mitrovicës për vitin 2019, ku zyrtari kryesor financiar, Adem Fazliu, njoftoi ekzekutivin lidhur me të arriturat dhe të gjeturat nga ky raport. Me këtë rast ekzekutivi i komunës u dakorduan që në mbledhjen e radhës së bordit, të jepen sqarimet e duhura nga të gjeturat, për përpilimin e planit të veprimit për implementimin e rekomandimeve të dhëna nga Zyra Kombëtare e Auditimit.

Ndërsa gjatë këtij takimi kryetari i komunës, Agim Bahtiri, ka marrë vendim që t’ua ndalojë të gjitha drejtorive komunale shpenzimet për dreka dhe darka zyrtare, me qëllim të kursimit të mjeteve buxhetore, në mënyrë që këto mjete të dedikohen në të mirë të qytetarëve.

“Gjithashtu u diskutua edhe për menaxhimin e hapësirave publike në Mitrovicë, me ç’ rast u kërkua nga Drejtoria e Inspeksionit të ndërmerr të gjitha masat e nevojshme, për largimin e shitësve të cilët operojnë pa leje paraprake nga organet kompetente, nëpër hapësirat e qytetit, konkretisht në sheshe, duke penguar kështu lëvizjen e lirë të qytetarëve”, thuhet në njoftim.

Drejtoresha e Shëndetësisë, Erseka Hasanaj Barani, shpalosi gjendjen aktuale me virusin COVID-19 në Mitrovicë, ku potencoi se deri më tani janë gjithsej 72 raste aktive pozitive me këtë virus, dhe 28 të shëruar, si dhe në bashkëpunim me drejtorinë për Mirëqenie Sociale këtyre rasteve u kanë dalë në ndihmë përmes pakove ushqimore dhe atyre mjekësore.

Po ashtu Bordi diskutoi edhe një sërë temash që ndërlidhen me mirëqenien e qytetarëve, ku pati edhe propozime të ndryshme që kanë të bëjnë me rregullimin më të mirë të funksionimit në secilën drejtori dhe rritjen e kualitetit të shërbimeve ndaj qytetarëve.

Shfaq komentet
comments powered by Disqus
Sot mund të lexoni Shfletoni kopertinat