Bazuar në vlerësimet analitike të bëra nga raportet periodike përgjatë vitit 2020, në zonën e përgjegjësisë së Drejtorisë Rajonale në Mitrovicën e Jugut, viti 2020 shënon rënie të përgjithshme të incidenteve dhe rasteve të tjera.
Marrë parasysh se viti 2020 ishte një vit i sfidave të përgjithshme, ku përkundër angazhimeve të vazhdueshme policore në mbrojtje të shëndetit publik në zbatim të masave kundër Covid-19, rezultatet e arritura janë inkurajuese. Kështu ka b╒rë të ditur përmes një komunikate zëdhënësi i policisë për rajonin e Mitrovicës, Avni Zahiti.
“Rënia e numrit të rasteve në përgjithësi rezulton efikasitetin dhe bashkëveprimin ndërmjet njësive e sektorëve të ndryshëm në përmbushje të planit vjetor të punës.Sa i përket rasteve të veprës penale ’vrasje’ gjatë vitit 2020 nuk është shënuar asnjë rast i vrasjes në zonën e Drejtorisë Rajonale në Mitrovicë Jug”, ka bërë të ditur Zahiti.
Ndërsa ka theksuar se krahasuar me vitin paraprak, rënie të veprave penale kanë shënuar veprat ( grabitje për -36%, lëndime të lehta trupore -26%, vjedhje të rënda -3,5%, sulm ndaj personit zyrtar -53%, falsifikim i parasë -30%). Ndërsa në fushën e sigurisë në trafikun rrugor rënie të rasteve kanë shënuar aksidentet me lëndime -18%, rrezikim i trafikut publik -43%.
“Po ashtu si rezultat i punës policore gjatë këtij viti janë konfiskuar 116 armë dhe municion mbi 10,800 copë të llojeve të ndryshme. Ky rezultat reflekton angazhimet e vazhdueshme policore dhe masat e ndërmarra në parandalimin e veprave penale”, tha Zahiti.
