​Varrosen tre të zhdukur nga lufta e fundit në Kosovë

Mitrovica

​Varrosen tre të zhdukur nga lufta e fundit në Kosovë

Më: 25 qershor 2021 Në ora: 17:20
Pamje nga vendi i ngjarjes

Remzi (Kadri) Kurteshi (1979), Dibran (Ramë) Dibrani (1930) dhe Zeqir (Bajram) Muja, të tre këta nga komuna e Mitrovicës, të vrarë nga forcat paramilitare dhe ushtarake serbe gjatë luftës së fundit në Kosovë dhe që ishin të zhdukur deri tash, janë varrosur sot në varrezat e martirëve në Mitrovicë.

Trupat e tyre të cilat u identifikuan përmes AND-së, u gjetën kohë më parë në varrezat myslimane në veri të Mitrovicës.

Agim Bahtiri, kryetar i Mitrovicës, tha se dita e sotme është dhimbje jo vetëm për mitrovicasit, por për të gjithë qytetarët e Kosovës. Duke përmendur shifra, ai kërkoi nga autoritetet vendore dhe ndërkombëtare që të bëjnë më shumë trysni tej shteti serb për dhënien e informacioneve në lidhje me të pagjeturit.

Bahtiri: Në Mitrovicë janë edhe 116 persona të pagjetur

“Është dhimbje për të gjithë qytetarët e Republikës së Kosovës që edhe pas 21 vitesh ne nuk i kemi më të dashurit tonë . Janë 1 mijë e 632 raste të cilat ende janë të paidentifikuar dhe të pazbuluar se ku janë. Në Mitrovicë janë 116 persona të cilët hulumtohen dhe kërkohen për t’i gjetur dhe për ti varrosur”, ka thënë Bahtiri.

Bajram Çerkini, kryetar i Shoqatës për personat e pagjetur “Zëri i prindërve”, ka kërkuar nga familjarët e këtyre tre martirëve që dhimbjen e tyre ta kthejnë në krenari.

Çerkini: Gjetja e një personi na jep shpresë edhe neve tjerëve

“Kur gjendet vetëm një person në Kosovë, të gjithëve na jep shpresë se edhe ne do t’i gjejmë…Kisha pasur dëshirë që këtë ankth që e keni ta ktheni edhe në krenari”, theksoi Çerkini.

Nesrete Kumnova, nga “Thirrjet e nënave”, u shpreh se ka bashkëndjerë gjithmonë me familjarët e të pagjeturve.

Sipas saj, Mitrovica sot nuk është vetëm, sepse me të janë edhe familjarët nga Gjakova dhe mbarë Kosova.

Ajo bëri thirrje poashtu tek institucionet vendore dhe ndërkombëtare që të angazhohen më shumë në këtë cështje.

Kumnova: Ju kam kuptuar gjithnjë dhe kam bashkëndjerë me ju familje të dashura

“Ju kam kuptuar gjithnjë dhe kam bashkëndjerë me ju familje të dashura. Sot më ka ftuar baca Bajram që Mitrovica të mos jetë vetëm, por me Mitrovicën, familjet Dibrani, Muja dhe Kurteshi, jemi edhe ne familjarët nga Gjakova dhe mbarë Kosova. …Nga këtu, Mitrovica, ashtu sic do ditë nga Gjakova, ju bëjmë thirrje të gjitha institucioneve vendore dhe ndërkombëtare që të angazhohen më shumë që familjarët tanë të rrëmbyer e të zhdukur të na kthehen” , tha Kumnova.

Në anën tjetër, Kushtrim Gara, udhëheqës i Njësisë së komisionit qeveritar për persona të zhdukur, ka potencuar se sot nga qyteti I Mitrovicës nderohen jo vetëm këta tre martirë, por të gjithë ata që mungojnë.

Ai shtoi se sot kujtohet edhe lavdia e popullit të Kosovës i cili mbijetoi duke qëndruar mbi parimet e së drejtës për liri dhe shtet.

Gara përkujtoi obligimin e institucioneve për të cilat tha se duhet vazhduar me angazhimin maksimal në mënyrë që të ndriçohet fati edhe i personit të fundit.

Gara: Plagët dhe dhimbjet mund të ngushëllohen vetëm me të vërtetën dhe drejtësinë

“Sot sigurisht nga Mitrovica ne nderojmë edhe të gjithë të tjerët që na mungojnë…Mungesa e të afërme dhe rivarrimet, na përkujtojnë se në luftë nuk ka humbje më të madhe se sa humbja e më të dashurve…Sot kujtojmë edhe lavdinë e popullit tonë i cili mbijetoi duke qëndruar mbi parimet e së drejtës për liri dhe për shtet. Eshtrat e Dibran Dibranit, Zeqir Mujës dhe Remzi Kurteshit, u gjetën në varrezat e shqiptarëve në Mitrovicë, pra sa afër, edhe larg. Afër nga vendbanimet ku jetuan në shtëpitë e tyre dhe larg për nga koha, 22 vite pas…Plagët dhe dhimbjet mund të ngushëllohen vetëm me të vërtetën dhe drejtësinë. Andaj, është obligim i yni që bashkërisht me përpjekje maksimale të vazhdojmë angazhimin dhe ndriçimin e fatit edhe të personit të fundit i cili është në listën e personave të pagjetur”, sqaroi Gara.

Ndryshe, ceremonia e varrimit u organizua nën mbikëqyrjen e kryetarit të komunës së Mitrovicës, Agim Bahtiri, në bashkëpunim me Shoqatën “Zëri i prindërve”.

Shfaq komentet
comments powered by Disqus
Sot mund të lexoni Shfletoni kopertinat