90 përqind e pacientëve me COVID në Spitalin e Mitrovicës janë me oksigjeno-terapi

Mitrovica

90 përqind e pacientëve me COVID në Spitalin e Mitrovicës janë me oksigjeno-terapi

Më: 6 shtator 2021 Në ora: 23:44
Foto ilustrim

Edhe në Spitalin e Mitrovicës janë rritur kapacitetet për të trajtuar pacientët që janë infektuar me COVID-19.

Aktualisht në këtë spital janë duke marrë trajtim 58 pacientë teksa 90 përqind e tyre janë në asistimin e oksigjeno-terapisë.

Ushtruesja e detyrës së drejtoreshës së Spitalit, Luljeta Zhubi, në “Edicionin Special” deklaroi se kanë kapacitete të menaxhimit të situatës.

“Për momentin i kemi të shtrirë 58 pacientë në pesë reparte. Me oksigjenim të sforcuar i kemi dy pacientë ndërsa 90 përqind e pacientëve të tjerë i kemi me oksigjeno-terapi”.

“Oksigjen kemi mjaftueshëm pasi jemi furnizuar dhe nga sot jemi të kompletuar me staf shëndetësorë edhe me stafin ndihmës që na e ka ofruar Ministria e Shëndetësisë e kjo ka ndihmuar në lehtësimin e punës dhe shërbimeve më kualitative”, tha Zhubi.

Në mesin e të infektuarve me koronavirus ka edhe pacientë që kanë marrë të dyja dozat e vaksinës kundër COVID-19.

“Kam ardhur në gjendje pak më të rëndë. Jam i vaksinuar me të dy dozat e vaksinës e për atë nuk i kam simptomat si të infektuarit tjerë këtu pasi nuk kam as temperaturë as kollë – por kam komplikime në frymëmarrje”, tha një pacientë i infektuar.

Një paciente që është duke marrë trajtim thotë se nga informacionet se vaksinat janë false nuk është vaksinuar e tash po i vuan pasojat.

“Nga sot jam shtrirë në spital dhe jam me simptoma të rënda. Nuk jam vaksinuar pasi ka pasur lloj-lloj informacione nga njerëzit se vaksinat janë false e janë të mbushura me ujë e kripë”.

Ndërsa një tjetër i infektuar tha se nuk arriti të vaksinohej ndaj COVID-19 për shkak se nuk kishte termine të lira.

“Jam i shtrirë në spital që nga e mërkura, dhimbje nuk kam kurrkund por e ndjej vetën shumë të lodhur. Nuk jam vaksinuar pasi në kohën kur kam dashtë të vaksinohem nuk ka pasur termine – por është shumë më mirë me qenë i vaksinuar”, tha Muhamet Zejnullahu i infektuar me COVID-19.
Një pacientë që është i vaksinuar me të dy dozat e vaksinës kundër COVID-19 thotë se ka simptoma më të lehta sesa pacientët tjerë.

commentFirst article
Sot mund të lexoni Shfletoni kopertinat