Dhjetëra militantë të ‘Listës serbe’ janë mbledhur të mërkurën pasdite para selisë së Iniciativës Qytetare ‘SDP’ Oliver Ivanoviq në veri të Mitrovicës, derisa në seli po qëndronte kryetari i Komunës së Beogradit të Ri, Aleksandar Shapiq. Ata u shprehën kundër vizitës së kryetarit Shapiq në selinë e Iniciativës Qytetare ‘SDP’.
Protestuesit mbanin në duar pankarta me mbishkrime ‘Oliver, kush po ta paguan mbrojtjen’, ‘Gangulica, tani je kujtuar për Kosovën’ dhe të ngjajshme.
Në mesin e të tubuarve kishte edhe punonjës të kompanive të Ujësjellësit dhe Elektro Distribucionit në veri, të cilët kërcënuan me ndërprerje të rrymës dhe ujit në selinë e SDP-së.
KP ka provuar të kontaktojë me kryetarin e ‘SDP’-së Oliver Ivanoviq për të marr një prononcim rreth ngjarjes, mirëpo përkundër premtimeve nga ky i fundit, një gjë e tillë nuk është arritur.
Ndryshe, ish -vaterpolisti i njohur i reprezentacionit të Serbisë, aktualisht kryetar i komunës së Beogradit Shapiq, është duke qëndruar në një vizitë dy ditore në veri të Kosovës.