Nëna e një fëmijë që u mbyt në banjë rrezikon të dënohet deri me 9 vite burg pasi dyshohet se la të pashoqëruar vajzën 6-muajshe për të kontrolluar llogarinë e saj në Facebook.
23-vjeçarja Kayla Lynton është arrestuar në Tel Aviv të Izraelit nga autoritetet të cilat po hetojnë pretendimet për neglizhencë në lidhje me vdekjen e vogëlushes Naomi në muajin Korrik.
Fillimisht Kayla raportohet se ka thënë se e la vajzën për të shkuar në tualet, por tani hetuesit po përpiqen të provojnë pretendimin se ajo ishte në Facebook dhe Instagram në kohën që e vogla e saj u mbyt në vaskë.
Ekziston mundësia që 23-vjeçarja të ketë vizituar llogaritë e saj në rrjetet sociale teksa po kryente nevojat e saj personale në tualet, por hetuesit po përpiqen të zbardhin se çfarë ndodhi ekzaktësisht në ato 10 minuta që i morën jetën Naomit.
Kayla, e cila është e martuar me britanikun Ilan Lynton, raportohet se telefonoi shërbimet e urgjencës kur e gjeti pa ndjenja të bijën, por e vogla nuk u arrit të shpëtohej dhe humbi jetën pas një jave në koma.
Bashkëshorti konfirmoi për “The Mirror” se celulari i Kaylas është sekuestruar nga hetuesit si pjesë e hetimeve.
Ilan Lynton u shpërngul nga Londra në Tel Aviv 5 vite më parë, ku u martua me Kaylan në vitin 2015. Në vitin 2016 çiftit i lindi vajza e parë Elizabeth ndërsa në vitin 2018 lindi Naomi.
