"EC Ma Ndryshe" kërkon nga komunat e Prizrenit që të rrisin buxhetin për mbrojtjen e mjedisit - Bota Sot
"EC Ma Ndryshe" kërkon nga komunat e Prizrenit që të rrisin buxhetin për mbrojtjen e mjedisit

Ndryshe

"EC Ma Ndryshe" kërkon nga komunat e Prizrenit që të rrisin buxhetin për mbrojtjen e mjedisit

Më: 9 tetor 2019 Në ora: 13:23
Logo e fushatës

Organizata joqeveritare “EC Ma Ndryshe” ka kërkuar nga komunat e rajonit të Prizrenit që të rrisin buxhetin për mbrojtjen e mjedisit.

Përmes një komunikate për media të “EC Ma Ndryshe” bënë të ditur se ka kërkuar informata zyrtare nga komuna e Prizrenit, Suharekës, Malishevës, Rahovecit, Dragashit dhe ajo e Mamushës, mbi vlerën e buxhetit të planifikuar për mbrojtjen e mjedisit për vitin 2019 dhe për vitin 2020. 

Duke marrë për bazë nevojën për parandalimin e ndotjes së mjedisit si dhe aplikimin e masave për përmirësimin e tij, “EC Ma Ndryshe” kërkon nga Komunat e rajonit të Prizrenit që të tregojnë përkushtim të shtuar në mbrojtjen e mjedisit për të përmirësuar standardet e jetesës për qytetarët e kësaj komune.

Pas marrjes së përgjigjes nga komunat e lartpërmendura, duke vlerësuar që ka ngecje në implementimin e politikave publike për adresimin e çështjeve mjedisore, “EC Ma Ndryshe” kërkuar që këto të fundit të rrisin buxhetin e planifikuar për mbrojtjen e mjedisit.

Në këtë njoftim “EC Ma Ndryshe” ka përfshirë edhe përgjigjet e komunave përkatëse.

“Komuna e Prizrenit ka njoftuar se vlera e buxhetit për mbrojtjen e mjedisit për vitin 2019 është 2,5 milionë euro. Kjo Komunë ka theksuar se kjo vlerë është e njëjtë edhe për vitin 2020. Komuna e Suharekës ka njoftuar se në buxhetin për vitin 2019 për mbrojtje të mjedisit ka planifikuar 187,000 euro ndërsa për vitin 2020 ka planifikuar 228,000 euro.

Komuna e Malishevës dhe ajo e Rahovecit kanë ofruar përgjigje në kërkesat për qasje në dokumente publike, mirëpo në këto përgjigje nuk kanë precizuar se sa është vlera e buxhetit të planifikuar për mbrojtjen e mjedisit në vitin 2019 dhe në vitin 2020. Komuna e Dragashit nuk ka ofruar fare përgjigje rreth kësaj teme.

Ndërsa Komuna e Mamushës në planifikimin e saj buxhetor për vitin 2020 ka paraparë ulje të ndjeshme të mjeteve financiare për mbrojtjen e mjedisit në krahasim me vitin 2019. Sipas informatave zyrtare të pranuara nga Komuna e Mamushës del se në vitin 2019 shuma e buxhetit të planifikuar për mbrojtjen e mjedisit në këtë komunë ka qenë 165,000 euro, ndërsa për vitin 2020, planifikohet një shumë prej 70,000 eurove.

EC Ma Ndryshe i bën thirrje Komunave të rajonit të Prizrenit që të marrin përgjegjësi në këtë drejtim dhe të rrisin buxhetin e planifikuar për mbrojtjen e mjedisit. Njëherësh i’u bën thirrje që ta rrisin transparencën në raport me implementimin e politikave publike për adresimin e çështjeve mjedisore”, thuhet n këtë komunikatë.   

Kujtojmë se Raporti i Komisionit Evropian për Kosovën për vitin 2019 ka theksuar se problemet serioze mjedisore vazhdojnë të ndikojnë në jetesën dhe shëndetin e njerëzve. Sfidat e mbrojtjes së mjedisit sipas këtij raporti kërkojnë më tepër vullnet politik, pasi që ka ngecje në implementimin e politikave publike për adresimin e çështjeve mjedisore.

Projekti “Monitoruesi Mjedisor” përkrahet financiarisht nga Fondacioni i Kosovës për Shoqëri të Hapur (KFOS).

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...